Зират коймаларын буядык

Безнең кечкенә генә Таулык авылында да яхшы күңелле, хезмәт сөючән, туган җирнең кадерен белеп, ата-баба йолаларын хөрмәт итүче кешеләр яши. Авылыбыз үзенең чисталыгы, матурлыгы, төзеклеге белән аерылып тора. Иң мөһиме, әлеге матурлыкны авылым кешеләре ниндидер дәүләт программалары көтеп тормыйча, күмәк көч ярдәме белән булдырырга күнеккән. Торган җиребезне генә түгел, мәңгелек йортыбызны да төзекләндерү, чистарту буенча күп эшләр башкарыла. Ел саен бердәм булып, яз башында өмәләр ясау гадәте бар. 
Изге Рамазан аенда авыл халкы һәм читтә яшәүче авылдашларыбызның зур матди ярдәме һәм уртак тырышлыгы белән зират кирәк-яраклары яңартылды: көрәк, пычкы, такталар, мәет юуу өчен алъяпкыч, халатлар алынды. Авылыбыз уртасында әллә кайдан нур сибеп торучы мәчетебезне дә тышкы яктан буяу, матурлау эшләре башкарылды. Изге Корбан бәйрәме якынлашкан көннәрдә зират коймаларын буяу буенча зур өмә оештырылды. Авыр эшне күмәк кул җиңгән, дигәннәр борынгылар. Авылдашлар, яше-карты бердәмләшеп бик күләмле эш башкардык. Авылда туып, бүгенге көндә читтә яшәүчеләр дә бу изге эштән читтә калмады. Ә укучы балаларның мондый өмәләрдә катнашуы аеруча куанычлы. Өлкәннәр янәшәсендә эшләп алар әби-бабаларының кайда җирләнгәнен күрәләр, мәрхүмнәргә дә игътибар, кайгырту кирәклегенә төшенәләр, иман-игелекләре арта.
Шушындый изге эш нәтиҗәсендә мәңгелек йортыбыз тагын да чистарып, төзекләнеп калды. Якыннарыбызның рухы шат булсын, исәннәргә хәер-фатихада ятсыннар. Изге Корбан бәйрәме алдыннан башкарган гамәлләребез һәрбер йортка бәрәкәт, гаиләләребезгә бәхет һәм тәүфыйк китерсен. 

Энҗе Гыймазетдинова, 
башлангыч сыйныфлар укытучысы.
Таулык авылы.

Фото Рузинә Зиннәтуллина тарафыннан бирелде.