Язның бер көне ел туйдыра

Язгы көн ел туйдыра дип аксакаллар юкка гына әйтмәгән. Яз – булачак уңышның язмышы хәл ителгән ел фасылы. Шуңа да районыбыз аграрийлары язгы чәчү эшләренә ныклы әзерлек белән керде – авыл хуҗалыгы техникасы тулы куәтенә эшләрлек. Техника ягулык-майлау материаллары белән тулысынча тәэмин ителгән. Шунысын да әйтергә кирәк, техника өчен ташламалы бәядән – литры 45 сумнан җитәрлек күләмдә дизель ягулыгы кайтарылган. 
– Һава торышы җылынуга таба бара. Шуңа күрә кырларда дым каплату эшен вакытында башкару мөһим. Бу агрочараны вакытында үтәп чыгу өчен җирлегебездәге барлык хуҗалыкларда, ҖЧҖләрдә, КФХларда  кырларны тырмалау – дым каплату эше тулы куәтенә бара. Игенче, гомумән авыл хуҗалыгы тармагында хезмәт куйган кеше һава торышының уңай килүен файдаланып калырга тырыша. Җирлегебездәге «Вилданов» крестьян-фермер хуҗалыгында, «Ярыш» ҖЧҖе,  «Парадиз» ҖЧҖе, «Камский бекон» ҖЧҖдә бу эш 2 сменада, ягъни тәүлек әйләнәсенә оештырылган. 
Язгы чәчүне уңышлы гына башлап җибәрүче аграрийлар да бар. Бордыдан Гәрәеф Илшат крестьян-фермер хуҗалыгы  язгы чәчүгә төште – 50 гектар җирдә борчак чәчте. Хәзергесе вакытта «Кама» агрофирмасы борчак, арпа чәчү белән мәшгуль. «Парадиз» ҖЧҖендә шикәр чөгендере чәчүгә әзерлек бара. Бүген алар 160 гектар җирдә көнбагыш чәчү эшенә керештеләр,  – ди район авыл хуҗалыгы һәм азык-төлек идарәсе башлыгы Рәшит Васил улы Хәбетдинов. 
Хәзерге чорда, дөньяда барган вәзгыятьне истә тотып, авыл хуҗалыгы продукциясе белән халыкны тулысынча тәэмин итү – көнүзәк мәсьәлә. Район аграрийлары язгы чәчүне үзвакытында һәм тиешле дәрәҗәдә башкарып чыгу өчен бөтен мөмкинлекләрне дә файдаланалар.

/ Р.Зәкиев фотосы.