Яңгырлар Тукай районында чәчүне тоткарлый

Республика буенча сабан культураларын чәчү 21 майга 92 процентка башкарылган. ТР Авыл хуҗалыгы һәм азык-төлек министрлыгы мәгълүматларына караганда, кайбер районнар сабан культураларын чәчүне тәмамлаган. Безнең районда исә берничә көн буена яуган яңгырлар нәтиҗәсендә кыр эшләре тукталып торды.

- Соңгы көннәрдәге явым-төшемнәр үзенекен итте. Бүгенге көндә хуҗалык кырларында эш тулысынча туктап калды. Шул сәбәпле чәчүне төгәлләү вакыты да сузыла. Шулай да яңгырның уңай яклары да бар. Алдан чәчелгән мәйданнар, уҗымнар өчен бу яңгырлар бик файдалы, үтемле булды, - ди районның авыл хуҗалыгы һәм азык-төлек идарәсе башлыгы Хәйдәр Сабитов.