Якташыбыз бүләкләнде

admin, 28 июль 2022 - 15:35

536

22 һәм 23 июльдә Болгар музей-тыюлыгы территориясендә «Ага-Базар»II Халыкара этнокультура фестивале узды. Фестиваль 22 июльдә 14.00 сәгатьтә үзәк сәхнәдә ачылды. Анда уникаль кул эшләре товарлары белән сәүдә рәтләре, тематик мәйданчыклар, декоратив-гамәли сәнгать буенча иҗади шөгыльләре булган һөнәрчелек остаханәләре тәкъдим ителде. Ә төп сәхнәдә «Иске Казан түгәрәк уены» татар фольклоры фестивале башланып китте.

РФ Президенты Владимир Путин тарафыннан игълан ителгән мәдәни мирас елында Идел буе халыкларының көнкүрешенә, милли киеменә һәм аш-суына басым ясалды.
«Ага-Базар» II Халыкара этнокультура фестивале кысаларында хореография сәнгатен үстерүгә керткән өлеше өчен Татарстан Республикасы Мәдәният министрлыгының Рәхмәт хаты белән «Татарстан Республикасы Тукай муниципаль районының мәдәният һәм ял үзәге» муниципаль бюджет учреждениесенең балетмейстеры – куелыш остасы Венера Мансур кызы Кашапова бүләкләнде. Якташыбызны чын күңелдән тәбрик итәбез!