Татарстан Республикасы мөфтие сайлауда тавыш бирде

Илдә тынычлык булсын, иминлектә, муллыкта, бердәмлектә яшәргә язсын, диде мөфти.

Татарстан мөселманнары Диния нәзарәте рәисе, мөфти Камил хәзрәт Сәмигуллин Россия Федерациясе Президентын сайлауда катнашты. Ул Казанның Ботаника урамы, 7 нче йорт адресы буенча урнашкан 88 нче урта гомумбелем бирү мәктәбендәге 279 нчы сайлау участогында тавыш бирде.

Тавыш биргәннән соң, Камил хәзрәт Сәмигуллин журналистларга үз бурычымны үтәдем, дип хәбәр итте. "Сайлауга күтәренке кәеф белән килдем. Тавыш бирү аша, киләчәкне билгелибез. Сайлауга бару һәркемнең изге бурычы. Үз тавышын һәрбер гражданин бирергә тиеш. Мин дә бу бурычымны үтәдем. Илдә тынычлык булсын, иминлектә, муллыкта, бердәмлектә яшәргә язсын", - диде мөфти.

Сайлау бюллетеньнәрен үтә күренмәле урнага төшергәч, мөфти хәзрәтләренә "Мин тавыш бирдем" дип язылган махсус беләзек бирделәр.

Искәртеп үтәбез: бүген мондый беләзекне сайлауларда катнашкан һәр кешегә бирәләр һәм ул көн дәвамында җәмәгать транспортында бушка йөрергә рөхсәт итә. Моннан тыш, әлеге беләзекләре булган кешеләр "Казан-Арена" территориясендә популяр җырчылар Валерий Меладзе һәм Егор Крид чыгышын карый алачак.