Сүгенгән өчен 20 мең сум штраф салганнар

Әлмәттә ЮХИДИ хезмәткәре хокук бозучыны туктатып аннан документларын сораган. Автомобиль йөртүче гауга чыгарып, китеп барырга җыенганда аны тоткарлыйлар, дип яза җирле басма.

Беркетмә төзү вакытында ир-ат шаһитләр каршында автоинспекторга сүгенү сүзләре ишеттерә. Аны “Хакимият вәкилен мыскыл итү” дигән маддә нигезендә хөкем иттеләр.

Ул үз гаебен яртылаш гына таныган. Әлеге ир-ат сүзләре буенча, аның мондый адымына инспектор сәбәпче. Әлмәт шәһәр суды сүгенгән өчен әлмәтлегә 20 мең сум штраф салды.