Районга быел Үзбәкстаннан күченеп кайтучылар күп

Якын чит илләрдән иң күп күченүчеләр Үзбәкстаннан. Андыйлар 352 кеше теркәлгән. Икенче урында - Таҗикстан. Аннан 179 гражданин күченеп кайткан. Кыргызстаннан - 45, Украинадан - 34, Азербайҗан һәм Казахстаннан - 25әр, Әрмәнстаннан 14 кеше, гражданлыгы булмаган 1 кеше күченгән. Ерак чит илләрдән Төркия, Литва, Англия, Сингапур, Тувалу, Төрекмәннән килүчеләр бар.

Чит ил гражданнарының 16 проценты шәхси максатларда, 81 проценты хезмәт эшчәнлеге алып бару өчен килгән. Узган ел бу күрсәткечләр башкачарак булган: шәхси максатларда халыкның 33 проценты, эшләргә 66 проценты килгән булган.

Районда махсус рөхсәт белән (вид на жительство) 125 чит ил кешесе яши. Аларның күпчелеге Иштирәк, Мәләкәс авылларында, Круглое Поле поселогында. Вакытлыча рөхсәт белән яшәүчеләр - 92 кеше. Андыйлар шулай ук Круглое Поле поселогында, Теләнче Тамак, Суровка авылларында күп.

Быел 5 кеше РФ гражданлыгы алуга иреште. Чит ил гражданнары райондагы криминоген хәлнең тотрыклылыгына зыян китермәде, дип белдерде миграция пункты башлыгы.

Чит ил гражданнарының Россия Федерациясенә керү һәм анда яшәү кагыйдәләре буенча административ хокук бозулар 21 процентка кимегән. Шуның белән бәйле рәвештә штраф салулар да азайган. Шулай итеп, бу төр хокук бозу өчен барысы 120 мең сум штраф түләтелгән. Ялган документлар белән килүчеләр теркәлмәгән.

Гомумән алганда, быел Тукай районында теркәлүчеләр саны, узган елның шушы чоры белән чагыштырганда, 16 процентка арткан. Былтыр бу күрсәткеч 2077 булса, быел 2396га җиткән. Ә пропискадан төшүчеләр, киресенчә, 29 процентка кимегән (1579 һәм 1064).