Районда халыкара террорчылыкка каршы теләктәшлек итү көненә багышланган төрле чаралар узды

Кнәз авыл җирлегендә узган акциядә IV сыйныф укучылары (Кнәз мәктәбенең тәрбия эшләре буенча директор урынбасары Наталья Цандер һәм башка укытучылар белән бергә) катнашты. Акция кысаларында Кнәз мәдәният йортында хәтер шәмнәре кабызылды, теракт корбаннары бер минут тынлык белән искә алынды. Аннары укучылар авыл китапханәсендә Беслан фаҗигасе белән бәйле документаль фильм карадылар, тоткыннарны азат итүдә катнашканнар батырлыгы турында сөйләштеләр. Әңгәмә вакытында укучыларның шәхси иминлегенә дә игътибар ителде. Гадәттән тыш хәл була калса, нишләргә, үзеңне саклап калу өчен нинди чаралар башкарырга икәнлеге, яшүсмерләргә кичектергесез хезмәтләрнең һәм полиция хезмәткәрләренең телефоннары әйтелде, дип хәбәр итә Кнәз мәдәният йорты директоры Тамара Тузеева.

Халыкара террорчылыкка каршы теләктәшлек итү көне уңаеннан, Теләнче Тамак авылында урнашкан картлар һәм инвалидлар интернат-йортында да чара узды. Интернат-йорт хезмәткәрләре тарафыннан «Террорчылыкка - юк» дип исемләнгән стенд, презентация ясалды. Аннары исә интернатта тәрбияләнүчеләр белән террорчылык темасына әңгәмә кордык, дип хәбәр итәләр картлар һәм инвалидлар интернат-йортыннан.

Шулай ук халыкара террорчылыкка каршы теләктәшлек итү көненә багышлап, Калмия, Сәет, Сәмәкәй, Түбән Суыксу, Иске Абдул, Иштирәк, Биклән, Шилнәбаш, Куады, Новотроицкое, Олы һәм Кече Шилнә, Калмаш, Мәләкәс, Мерәс авылларында да төрле чаралар узды. Мәктәпләрдә, китапханәләрдә һәм мәдәният йортларында укытучылар белән бергә балалар террорчылык турында әңгәмә кордылар, Беслан корбаннары истәлегенә шәмнәр кабыздылар, тынычлык символы булган торналар сурәтләрен агачларга элделәр, махсус документаль фильмнар карадылар.