«Подписка өчен телевизор!» акциясендә районнан 3 кеше катнаша

ТРда 2017 елның 25 октябреннән башлап 2018 елның 20 мартына кадәр абунәчеләр арасында «Подписка өчен телевизор!» дип исемләнгән махсус акция үткәрелүе турында хәбәр иткән идек. Акцияне оештыручы - «Татмедиа» акционерлык җәмгыяте. Моның өчен 2018 елга почта, редакцияләргә барып, Интернет, яисә ТР дәүләт хезмәтләре порталы аша 3тән дә ким булмаган «Татмедиа» агентлыгы газета-журналларына язылырга кирәк иде. Соңыннан түләү турында квитанцияне оештыручыларга җибәрү мәслихәт булды.

Конкурс 3 этапта үткәрелә. 2017 елның 25 октябреннән 2018 елның 20 гыйнварына кадәр оештыручылар абунәчеләрдән акциядә катнашу турында хатлар кабул иттеләр. Саллы гына призларны уйнату 9 февральгә билгеләнгән. Ә алар, чыннан да, кызыктырырлык - LED-телевизор, 3 цифрлы Nikon фотоаппараты, 15 данә сарык йоныннан җылы юрганнар һәм 45 данә бүләк җыелмалары. Акциянең өченче этабы - җиңүчеләргә бүләкләр тарату - 20 мартка кадәр билгеләнгән. Бәйге турында тулырак мәгълүмат, җиңүчеләр исемлеге белән www.tatmedia.ru сайтына кереп танышып булачак.

Әлеге акциядә безнең районнан Гөлсинә Фазуллина, Эльмира Мортазина, Зөһрә Маннапова катнашалар. Аларга уңышлар теләп калабыз!