Мусабай Заводның элеккеге комсомоллары очрашты

«Олы яшьтә булсак та, ул чорны сагынып искә алабыз, комсомолда эшләгән чагыбыз һаман да иң матур һәм хатирәләргә бай чор булып күңелебездә саклана», – диләр Римма апа Ибәтуллина белән Фәридә апа Фәрхетдинова. Алар, комсомолда чын тормыш мәктәбе узган өлкәннәребез, бүген дә активистлар, авылда үткәрелә торган иҗтимагый чараларны тынгысыз оештыручылар. 
Чарада катнашучы һәркем сүзен «Бүгенгедәй хәтердә...» дип башлады. Кайчандыр мәктәпнең башлангыч комсомол оешмасы секретаре булган, бүген авыл җирлеген җитәкләүче Фәридә Әгъләҗева да үзенең хатирәләре белән уртаклашты. Сыйныфлары белән, йөк машинасына утырып, Чаллы шәһәренә барып, комсомолга керүләре, үзенә йөкләнгән вазыйфалар, бигрәк тә комсомол взносы җыеп тапшыруның зур җаваплылык булганлыгы турында искә алды ул.
Очрашуда катнашучыларның әйтер сүзләре, уртак фикерләре, хатирәләре бик күп иде. Район үзәгенә барып, тантаналы рәвештә комсомол сафларына керү, кулларга комсомол билетын алып, аны кадерләп саклау зур мәртәбә иде шул ул чакларда. 
Китапханәдә шул еллардагы ВЛКСМ символы булып торган әйберләр, газета материаллары, илебезнең батыр ул һәм кызлары турында язылган китаплар урын алган күргәзмә дә эшләде. Чарада катнашучылар шигырьләр тыңладылар, бергәләп комсомол турындагы җырлар башкардылар. Кичә-очрашу бик җылы мохиттә узды, дип яза Мусабай Завод авылының китапханә мөдире Гөлшат Салихова.

Фото Гөлшат Салихова тарафыннан бирелде.