Якты юл
  • Рус Тат
  • Елның иң яхшы педагоглары

    Кече Шилнә авылы мәдәният йортында «Ел укытучысы-2022» һәм «Ел тәрбиячесе-2022» бөтенроссия бәйгеләренең муниципаль этабы җиңүчеләрен һәм призерларын бүләкләделәр. Әлеге күркәм һәм мәртәбәле бәйгедә быел район мәктәпләреннән һәм балалар бакчаларыннан барысы 57 педагог – 37 укытучы һәм 20 тәрбияче катнашты.

    – Хөрмәтле укытучылар, тәрбиячеләр! Сез иң изге, шул ук вакытта бик җаваплы хезмәт башкарасыз. Балаларны кулларыннан тотып белем иленә алып керәсез, үсеп җиткәч олы тормыш юлына озатасыз. Һөнәрегезгә тугры булуыгыз, күңел сафлыгыгыз һәм тырышлыгыгыз өчен рәхмәт сезгә! – дип башладылар алып баручылар тантаналы чараны. 
    Һөнәри осталык бәйгесендә катнашкан 57 педагогның гомуми стажын кушсаң 843 (!) елга тула. Мәгариф хезмәткәрләре бу бәйгеләргә җентекләп әзерләнделәр, ике ай дәвамында «Минем педагогик табышым», «Балалар белән үткәргән тәрбияви чарам» кебек биремнәрне үтәделәр, ачык дәресләр, сыйныф сәгатьләре уздырдылар, мастер-класслар күрсәттеләр.
    Мөгаллимнәргә рәхмәт сүзләре, тәбрикләүләр әйтелгәннән соң, җиңүчеләрне һәм призерларны сәхнәгә чакырдылар. Аларга үз номинацияләрендә бүләкләр тапшырдылар. «Ел тәрбиячесе-2022» бәйгесендә яхшы нәтиҗәләр күрсәткән 15 тәрбиячегә муниципаль этап катнашучылары дигән сертификатлар тапшырылды. Район башкарма комитеты җитәкчесенең социаль мәсьәләләр буенча урынбасары Илфак Бариев һәм мәгариф идарәсе башлыгы Өлфәт Сабиров һәр тәрбиячегә рәхмәт әйттеләр, игелекле эшләрендә тагы да югарырак уңышларга ирешүләрен теләделәр. 
    «Ел укытучысы-2022 бәйгесендә үзләрен сынаган 21 укытучыга шулай ук катнашучы сертификатлары тапшырылды. Укытучыларыбызның бүгенге осталыгы замана таләпләренә җавап бирә. Алар белән Тукай мәгарифе горурлана, рәхмәт белдерә.
    Аннары сәхнә түренә һәр ике бәйгенең дә лауреатлары чакырылды. Аларны район башкарма комитеты җитәкчесе Айрат Хәбибуллин котлады. Алар арасында Бәткенең «Аленушка» балалар бакчасы тәрбиячесе Александра Маламанова, Бәтке мәктәбенең татар теле укытучысы Рәмилә Шәрәпова, Калмаш мәктәбенең татар теле һәм әдәбияты укытучысы Илсөяр Кутуева бар. «Педагогик дебют» номинациясендә Яңа поселогы мәктәбеннән башлангыч сыйныфлар укытучысы Ләйсән Дәүләтова, Новотроицкое мәктәбенең инглиз теле укытучысы Регина Казакова бүләкләнде. Борды мәктәбенең башлангыч сыйныфлар укытучысы Елена Маслова, рус теле һәм әдәбияты укытучысы Светлана Вәҗиева, Круглое Поле поселогы мәктәбенең башлангыч сыйныфлар укытучысы Лидия Фәрхетдинова муниципаль этап лауреаты дипломнары белән бүләкләнделәр.
    Тәбрикләүләр балаларның чыгышлары белән үрелеп барды. Талантлы балаларны үстереп, сәхнәләргә чыгаручылар да шушы укытучылар, тәрбиячеләр.
    Район башлыгы Фаил Камаев, сәхнәгә күтәрелеп, укытучыларыбызга олы ихтирамын, рәхмәтен белдерде. Укытучыларсыз җирдә бер генә һөнәр иясе дә булмас иде, яшәешнең төп нигезен укытучылар, тәрбиячеләр сала, диде ул. Район башлыгы төрле номинацияләрдә җиңү яулаган педагогларга акчалата премияләр һәм дипломнар тапшырды. 
    «Ел укытучысы-2022» бөтенроссия конкурсының зона этабы да Тукай районында үтәчәк. 
    / Рөстәм Зәкиев фотолары.


    «Ел тәрбиячесе-2022» конкурсының муниципаль этабы җиңүчеләре һәм призерлары:
    Җиңүче: Гөлмира Хәйретдинова, Түбән Суыксу авылының «Ак каен» балалар бакчасы тәрбиячесе. 
    Призерлар: Чулпан Ильмендеева, Круглое Поле поселогының «Голубой вагон» балалар бакчасы тәрбиячесе; Зөлфия Рәхимова, Новотроицкое авылының «Ромашка» балалар бакчасы тәрбиячесе. 
    «Туган телдә белем һәм тәрбия бирүче төркем тәрбиячесе» номинациясендә җиңүче: Ләйсән Сәйфуллина, Мерәс авылының «Салават күпере» балалар бакчасы тәрбиячесе. 

    «Ел укытучысы» муниципаль конкурсы җиңүчеләре һәм призерлары:
    Җиңүче: Ксения Шәкүрова, Князево урта мәктәбенең башлангыч сыйныфлар укытучысы. 
    Призерлар: Лилия Шәмсиева, Бәтке мәктәбенең тарих укытучысы; Әлфия Әгъләмова, Комсомолец мәктәбенең физика укытучысы.
    «Татар теле һәм әдәбияты фәненнән иң яхшы укытучы» номинациясе җиңүчеләре һәм призерлары:
    Җиңүче: Нурия Загуменова, Князево мәктәбенең татар теле һәм әдәбияты укытучысы. 
    Призерлар: Лилия Якупова, Биклән мәктәбенең татар теле һәм әдәбияты укытучысы; Зилә Низамова, Түбән Суыксу мәктәбенең татар теле һәм әдәбияты укытучысы. 
    «Педагогик дебют» номинациясендә җиңүче һәм призерлар:
    Җиңүче: Александра Косоурова, Бәтке мәктәбенең инлиз теле укытучысы. 
    Призерлар: Евгений Жуков, Шилнәбаш мәктәбенең география укытучысы; Елена Владмирова, Кече шилнә мәктәбенең башлангыч сыйныфлар укытучысы.

    Бәйге җиңүчеләре һәм призерлары үз тәэсирләрен газета укучылар белән дә уртаклаштылар.
    Зилә Низамова, Түбән Суыксу мәктәбенең татар теле һәм әдәбияты укытучысы:
    – «Ел укытучысы» конкурсы һәр мөгаллимнән бик күп тырышлык, осталык, төгәллек сорый. Укучыларны кызыксындыру, теманы үзләштерүне җиңеләйтү өчен укытучылар нинди генә алымнар һәм ысуллар кулланмаган. Бәйге барышында мин шуңа сокландым. Аннан соң хезмәттәшләремнең үз белемнәрен күтәрү өстендә зур эш алып барулары, һөнәрләрен яратулары, бирелеп дәрес аңлатулары, балаларга булган мөнәсәбәтләре белән чиксез горурландым. Жюри әгъзалары да үзләренең дустанә мөнәсәбәтләре белән киеренкелекне киметтеләр, шуңа күрә чыгыш ясавы да бик авыр булмады. 
    Нурия Загуменова, Князево мәктәбенең татар теле һәм әдәбияты укытучысы:
    – «Ел укытучысы» бәйгесе миңа үземнең педагогик осталыгымны күрсәтергә һәм ачарга мөмкинлек бирде. Бәйге бик югары дәрәҗәдә оештырылган. Конкурсантлар – барысы да бик көчле укытучылар. Алар белән бер-беребезнең эш алымнарын күзәтү, тәҗрибә уртаклашу, фикер алышулар – үзе бер бәхет. Җиңүче исемен алу көтелмәгән, әмма бик күңелле хәл булды.
    Лилия Якупова, Биклән мәктәбенең татар теле һәм әдәбияты укытучысы:
    – Конкурста катнашу бик зур җаваплылык сорый. Бәйге шартлары буенча, таныш булмаган балаларга комиссия алдында дәрес бирергә һәм сыйныф сәгате үткәрергә кирәк иде. Ә бу бик дулкынландыра. Мәләкәс мәктәбе укучылары белән эшләгәндә дәреснең беренче минутларыннан ук дулкынлануым кимеде, алга таба алар белән эшләү рәхәт булды. Укучыларга зур рәхмәт. Чөнки баланың җавабы, аның битараф булмавы, дәрестә актив катнашуы гына дәресне җанлы итә. Гомумән, һөнәри бәйгеләрдә катнашу, коллегалар белән аралашу алга таба эшләргә стимул ясый. Мин үзем өчен күп нәрсә алдым. 
    Әлфия Әгъләмова, Комсомолец мәктәбенең физика укытучысы:
    –  Бәйге педагогик эшчәнлегемнең көчле һәм көчсез якларын ачарга ярдәм итте. Әзерлек барышында укучыларның активлыгын арттыру өчен яңа методик ысуллар эзләргә туры килде. Бәйге эшкә өстәмә стимул бирә, һөнәри үсешкә мөмкинлекләр ача. Җиңүчеләрне бүләкләү тантанасы бик дулкынландыргыч үтте. Оештыручыларга зур рәхмәт әйтәм. 
    Гөлмира Хәйретдинова, Түбән Суыксу авылының «Ак каен» балалар бакчасы тәрбиячесе:
    – Башка еллардан аермалы буларак, быелгы бүләкләү тантанасы үзенчәлекле булды. Бүләкләү тантанасындагы дулкынлану хисләре әле дә дәвам итә. Бу бәйгедә җиңүемә чиксез шатмын. Истәлекле кубок та миңа бәйге вакытындагы авыр, катлаулы, ләкин уңышка илткән мизгелләрне хәтерләтеп торачак. Катнашучыларның берсе дә игътибарсыз калмаган иде, шулай зурлау күңелгә рәхәтлек бирде. Шулай ук хезмәттәшләремнең һәрчак янәшәдә булулары, миңа ышанып, җиңүгә рухландырып торулары өчен чиксез зур рәхмәтлемен. 
    Ләйсән Сәйфуллина, Мерәс авылының «Салават күпере» балалар бакчасы тәрбиячесе:
    – Минем әлеге бәйгедә катнашуым беренче мәртәбә генә түгел. Шактый еллар нәни балалар белән эшлим. Шуңа күрә быел да катнашырга булдым. Чараны бик уйлап, тагы да яхшырак итеп оештырганнар. Бәйгенең нәтиҗәләрен дә озак көтмәдек. Катнашучылар өчен бу бик мөһим. Сәхнәгә чыгып, район вәкиле кулыннан бүләк алу мизгелләре күнелемдә бик озак сакланыр. Мондый конкурсларда катнашу үзеңә булган ышанычны арттыра. Ныклы тәҗрибә туплыйсың, уңай һәм тискәре якларыңны дөрес итеп күрергә өйрәнәсең. Эшеңә тагы да җаваплырак, төгәлрәк карый башлыйсың, булдыра аласыңа ышанасың.
    Евгений Жуков, Шилнәбаш мәктәбенең география укытучысы:
    – Конкурсның һәр этабы ныклы әзерлек, зур көч таләп итте. Миңа бәяләп бетергесез хезмәт тәҗрибәсе биргәннәре, балаларның самими елмаюлары, уңай эмоцияләре, үземне сынарга мөмкинлек биргәннәре өчен барлык оештыручыларга һәм катнашучыларга зур рәхмәт. 
    Александра Косоурова, Бәтке мәктәбенең инглиз теле укытучысы:
    – «Ел укытучысы-2022» бәйгесе миңа киләчәктәге педагогик эшчәнлегем өчен ныклы нигез, файдалы мәгълүмат бирде. Конкурста катнашу үземне ачарга, иҗади сәләтемне баетырга мөмкинлек тудырды. Мин яңа коллегаларым белән таныштым, аралаштым. Алар үз тәҗрибәләрен бүлеште. Әлбәттә, бик дулкынландым, шулай да бик кызыклы булды. Бәйге һөнәри үсештә ныклы адым булды. 
    Ксения Шәкүрова, Князево мәктәбенең башлангыч сыйныфлар укытучысы:
    – Минем өчен бу бәйге тәҗрибә алмашу, үзеңә читтән карау һәм компетентлы жюридан үзең турында фикерләрне ишетү мәйданы булды. Мин генә түгел, башка конкурсантлар да зур педагогик һәм тормыш тәҗрибәсе алганнардыр дип ышанам. Тәҗрибәле остазлар, кызыклы кешеләр очраштырган, мине үз һөнәремә гашыйк иткән бу бәйгегә зур рәхмәт.  

     

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: