«Бер сайлау кампаниясеннән дә читтә калганыбыз юк. Бүген дә илебездә тотрыклылык булсын дип сайлауларга килдек», – диләр «Татарстан» совхозы поселогыннан Наил һәм Гөлчәчәк Кәрәмовлар (фотолар)

Кнәз авыл җирлегендә урнашкан «Татарстан» совхозы поселогының мәдәният йорты бинасында урнашкан 2639нчы санлы сайлау участогында да сайлаулар, гадәттәгечә, күңелле барды. Сәгать иртәнге тугызга - 100, 10га исә 300 кеше үзләре сайлаган кандидатларга һәм партияләргә тавыш бирергә өлгергән иде инде.

Сайлау участогы ачылу белән кешеләр бер-бер артлы килә башладылар. Һәммә кеше күтәренке кәефтә, әлеге көнне чын бәйрәм кебек кабул итә. «Татарстан» совхозы поселогында урнашкан сайлау участогы комиссия әгъзалары белдерүенчә, сайлауга килүчеләрне биредә кайнар коймаклар, бал-май, тәмле чәйләр белән каршы алдылар. Моннан тыш үзешчән сәнгать осталары, фольклор коллективлар сайлауларга килүчеләргә матур концерт тәкъдим итте. Халык тукталып, аларның чыгышларын күзәтте.

- Бер сайлау кампаниясеннән дә читтә калганыбыз юк. Бүген менә оныкларыбызны ияртеп килдек. Киләчәгебезнең, бүгенге кебек үк, имин булуын телибез. Илебез тыныч булсын, - дип беравыздан әйттеләр безгә Наил һәм Гөлчәчәк Кәрәмовлар.

- Мин дә сайлауга һәрвакыт йөрим. Беркайчан да калдырганым юк, - дип сүзгә кушылды Наилә Яхина. - Депутатлардан коррупциягә каршы көрәшне көчәйтсеннәр иде дип сорар идем, - дип җаваплады ул.

Сайлау участогында сәяси партияләрдән күзәтчеләр дә бар иде. Алар шулай ук, төрле сәбәпләр аркасында, участокка килеп сайлый алмаучыларның өйләренә дә чыгып киткәннәр иде.