Айгөл Әхмәтгалиева белән очраштык

«Баланнарда бал тәме», «Синең өчен яшим», «Сагынган чакларымда», «Ак читек» һәм башка повестьлар, пьесалар, хикәяләр авторы китап дөньясында үзен ниләр борчуын, татар телен саклап калырга кирәклеген йөрәк түреннән чыгарып сөйләде ул, әсәрләрнең прототипларын да әйтеп үтте. Гыйбрәтле язмышлар, ачы сагышлар, аерылулар, югалтулар, бәхетсез мәхәббәт – гомумән, адәм баласының башыннан нинди генә язмышлар узмаган. Әнә шулар хакында Айгөл ханым китапларында һәр сүзнең егәрен, тәмен белеп яза. Сурәтләүләре хатын-кызның күңел йомшаклыгы, ана кешенең җан җылысы белән сугарылган.
Йомшак, ягымлы тавышлы, искиткеч мөлаем ханымны тамашачылар тын да алмый тыңлап утырдылар. Теләнче-Тамак, Мусабай-Завод, Яңа Бүләк, Иске Дөреш авыллары китапханәчеләре үзләренең чыгышларында Айгөл ханым турында татар язучыларының язмаларын укып үттеләр. Гөлнур Хәертдинова башкаруында язучының шигырьләрен дә тыңладык.
Гомумән алганда, Айгөл ханымның кайсы гына әсәрен алсак та, барысы да яратып, йөрәк түреннән үтеп язылган. Шундый китапларны тамашачылар сатып алу бәхетенә дә иреште. 
Мондый эчтәлекле очрашудан соң, Айгөл Әхмәтгалиеваның китапларын сорап китапханәгә килүчеләр күбәйде. Без китапханәчеләр өчен бу зур сөенеч. Чөнки күңел түреннән чыгып язылган әсәрләр үз укучыларын табарга тиеш, дип яза Теләнче-Тамактан баш китапханәче Рамилә Сәгъдиева.

Фото Рәмилә Сәгъдиева тарафыннан бирелде.