Выжлап оча чаңгы юлыннан
Бәйрәмгә килгән спорт мастеры, Олы Шилнә авылы кызы Нина Николаевна Фирстова ярышучы чаңгычыларны "булдырасыз, оланнар, шәп шуасыз", дип хуплап, финиш сызыгында ягымлы каршылый. "Сездән менә дигән олимпия чемпионнары үсеп чыгар әле", - дип күңелләрен күтәрә.
Ул үзе Олы Шилнә авылында гади эшче гаиләсендә туа. Николай Прокопьевич һәм Мария Ильинична Фирстовлар гаиләсендә дүрт бала үсә. Араларында Нина бердәнбер кыз. Өйдә әнисенә булышып, эш сөючән, тырыш бала булып үсә. Әтисе - механизатор, комбайнчы, әнисе - хисапчы-бухгалтер. Укудан бушаган вакытларында абыйлары-энесе белән тау шуарга, чаңгыда йөрергә ярата. Җәен сабан туйларында йөгерү, велосипедта узышуларда катнаша. Физкультура укытучысы кызның спортка сәләтен күреп, аны махсус спорт күнегүләренә тарта. 1970 елларда Боровецк урманында КамАЗ берләшмәсенең "Снежок" чаңгы базасы ачыла. Әтисенең бертуганы Василий дәдәй белән Нина әлеге базада чаңгы спорты белән ныклап шөгыльләнә башлый Нина. Район ярышларында призлы урыннарны яулый. Балалар-яшүсмерләр спорт мәктәбендә КамАЗ тренеры Виктор Петрович Калашников җитәкчелегендә системалы күнегүләр үтә. Сәләтле чаңгычы кызны республика һәм Союз күләмендәге ярышларга чакыра башлыйлар.
1976 елда Красногорск шәһәрендә үткән чаңгычыларның Бөтенсоюз ярышында 18 яшьлек Нина Фирстова, спорт остасы нормативын үтәп, "СССРның спорт остасы" дигән мактаулы исемгә лаек була. Шуннан соң аны даими Россия, СССР халыкара күләмендә үтә торган төрле ярышларга чакыралар. Ул СССРның яшьләр командасы составында чыгыш ясый. 1978-1979 елларда СССРның һәм РСФСРның җыелма командасы составында 5 километрлы эстафета ярышларында призлы урыннарны ала. 1978 елда 3-5 километрга яшьләр арасында шәхси-команда эстафетасында беренчелекне алып, СССР чемпионы исеменә лаек була. 1979 елда Сыктывкар шәһәрендә үткән, 3-5 километрлы эстафета ярышында - көмеш медаль Италиядә Россия җыелма командасы составында беренчелекне яулый, Свердловскида СССР халыкларының кышкы спартакиадасында, Мурманскида "Төньяк бәйрәме" һ.б. ярышларда да югары күрсәткечләргә ирешә.
1979 елда кияүгә чыга. Ике малай тәрбияләп үстерәләр. Чаңгыны ташламый. КамАЗ данын яклап, төрле ярышларда катнаша. Бүген райондашыбыз Нина Николаевна Яр Чаллы шәһәренең 27 нче урта мәктәбендә физик культура дәресләре алып бара. Җәмәгать эшләрендә катнаша. Шәһәр күләмендә үткән чаңгы ярышларын калдырмый, урта мәктәп коллективлары арасындагы ярышта да яхшы нәтиҗәләр күрсәтте.
Районыбызның Олы һәм Кече Шилнә авыллары халкы танылган чаңгы спорты остасы Нина Николаевна белән горурланалар. Аны әледән-әле укучылар белән очрашуга чакыралар. Ул спорттагы тәҗрибәсен яшьләр белән теләп уртаклаша, аларның уңышларына шатлана.
Иң мөһим һәм кызыклы язмаларны Татмедиа Telegram-каналында укыгыз
