Балаларда яман шеш авыруы

Күп кенә яман шеш авырулары сабый чакта ук билгеле була, кайберләренә генетик факторлар сәбәпче була, радиация тәэсирен дә онытырга ярамый. Нәни пациентларның күпчелегенең яман шеш авыруын китереп чыгарган сәбәпләр әлегәчә ачыкланмый кала бирә.

Соңгы елларда яман шеш авыруын химия терапиясе һәм нур белән дәвалау яхшы нәтиҗәләр бирә - авыруларның 80 проценттан артыгы бу куркыныч чирне җиңә, акрынлап терелә.

Экспертларның бәяләмәләренә караганда, авыру балаларның 30 проценты дәүләт статистикасына эләкми. Алар, башлыча, яман шеш белән туган балалар.

Районда 2017 елның башында 28 кеше онкологта исәптә тора. Шуларның 8е - балалар. Табибка вакытында мөрәҗәгать итү авыруны башлангыч чорда ачыклау мөмкинлеген бирә. Ә медиклар яман шешне беренче-икенче стадиясендә дәвалый башлаганда терапия нәтиҗәләрен бик уңай бәяли.

«Рак» диагнозы бик сирәк очракта профилактик тикшерүләр вакытында ачыклана. Шуңа күрә белгечләр сабыйларны әледән-әле тикшертеп торырга киңәш итәләр. Ата-аналар балаларында гадәти булмаган күренешләр күрсәләр, әйтик, сабыйның тән тиресе агарып китсә, тиз арыса, хәле бетсә, тик торганда тәнендә зәңгәр тимгелләр барлыкка килсә, авыртудан зарланса, аксап йөри башласа, тән температурасы еш күтәрелсә, баш авырту һәм косу еш кабатланса, сабый күзгә күренеп ябыкса, күрүе начарланса кичекмәстән баланы врачка күрсәтергә тиеш.

Россиядә рак белән авыручы балаларга Мәскәү, Санкт-Петербург, Обнинск, Ростов-на-Дону федераль медицина учреждениеләре базасында, шулай ук республика балалар больницаларының махсуслаштырылган бүлекләрендә һәм территория балалар онкогематология үзәкләрендә махсуслаштырылган медицина ярдәмен күрсәтәләр.

Илдар Хисаметдинов,
Тукай үзәк район хастаханәсе онкологы.