«Көзге муллык»: 19 нчы конкурсант Гөлсинә Гәрәйшина

Газета укучыларыбызның аеруча да яратып, «тәмләп», үзебезчә якын итеп исәнләшеп керүләре - җаннарыбызга әйтеп бетерә алмаслык рәхәтлек бирә. Сәет авылыннан ук килгән Гөлсинә апа Гәрәйшина белән дә нәкъ шулай булды. «Кызлар, исәнмесез! Хәлләрегез ничек? Нинди яңалыкларыгыз бар?» - дип килеп керде ул безнең янга. Тиз генә хәл-әхвәлләрне белешкәч, бәйгедә катнашырга теләген белдерде Гөлсинә апа. Ул да түгел, пакеттыннан берәм-берәм үзе үстергән кишерләрен чыгарып күрсәтә дә башлады. «Быел кишеребез уңды, Аллага шөкер. Әллә нинди олылары, чуклылары бар. Гап-гади үзем ясаган орлыктан үсеп чыкты бу табигать могҗизалары. Аларны казып алганда да, аеруча сак кыландык. Ни дисәң дә, үзебезнең бакчада, бер нинди химикатсыз үскән яшелчәләр бит», - дип сөйләде Сәет авылының ветераннар советы рәисе булып эшләүче Гөлсинә апа Гәрәйшина. Без аның үзен, аның яшелчәләрен бик теләп фотога төшереп алдык һәм «Көзге муллык» конкурсының чираттагы катнашучысы итеп куйдык.