-Табигатькә каршы барып булмый, әмма быел һава торышы шактый гаҗәпләндерде. Менә бүген җәйнең кыл уртасы, гадәттә, моннан соң көннәр көзгә авышырга тиеш. Бүген һава температурасы урыны-урыны белән 27 градуска җитте. Бу исә - җәйнең башлануы гына дигән сүз, - ди керәшеннәрнең танылган вәкиле, җырчы Вадим Захаров.
Питраудан соң, гадәттә, кошлар сайраудан, үләннәр үсүдән туктый. Дару үләннәрен, мунча себеркесен 12 июльгә кадәр җыеп калырга кушалар. Ә быелгы Питрауга керәшеннәр зур өмет баглый.
-Әби-бабайлар сүзләренә карасаң, тарихта мондый еллар булган. Җәй башы аяз көннәре белән сөендермичә, яңгыры белән "бүләкләсә", керәшеннәр Питрауны көткән. Гадәттә, шуннан соң көннәр ачылып, аязып киткән, чын җәй җиткән, - ди Вадим.
Җырчы сүзләренчә, Питрау көнне туган ир-балаларга Петр, Павел исеме кушалар. Шуңа күрә 12 июль - керәшеннәрдә барлык Петр, Павелларның туган көннәре. Бүген Питрау уразасы беткән көн, бу көнне кыз урлап өйләнешкәннәр.
Вадим быел "Питрау җитте - җәй үтте" гыйбарәсенең "искерүен" таный. Аңа матур көннәр чыннан да кирәк.
-Быел әле беренче кат печәнне дә җыеп ала алмадык, яңгыр койды да койды гына бит. Мин үзем дә Питраудан соң җәй килүен шатланып, түземсезләнеп көтәм, - ди ул.
Шатлык дигәннән, Вадим Захаров тормышында тагын бер күңелле яңалык бар. Аны сез дә бик тиздән беләчәксез. "Интертат.ру"ны күзәтеп барырга онытмагыз!
Нет комментариев