Юллар чистамы?

«Соңгы арада көчәйтелгән режимда эшлибез», - ди район территориясендә трассаларга һәм авыл арасындагы юлларга хезмәт күрсәтүче «Татавтодор» җәмгыятенең Яр Чаллы филиалы башлыгы Рәдис Вәсимов. Кышкы чорга кергәннән бирле алар юлларга 1,5 мең тонна комлы-тозлы катнашма сибәргә өлгергәннәр инде. Җитәкченең сүзләренчә, предприятиенең юлны чистарту, ком сибү кебек эшләрне башкара торган җиде машинаның дүртесе тәүлек дәвамында график буенча трассаларда эшли. Шулай ук ике «К-700» тракторы, өч грейдер юлны чистарта. Дүрт техника тәүлек дәвамында комлы-тозлы катнашманы төяп җибәреп тора.

Дүшәмбе көнне без Яр Чаллы - Зәй - Әлмәт шоссесы буйлап Иске Җирекле борылышы янындагы ике яклы тимер юл күпере өстендә юл кырыен, тротуарны чистартучылар белән бераз сөйләшеп, фотога төшереп кайттык. Без барганда биредә көрәкләр тоткан алты эшче, бер трактор күпернең кырыен, тротуарны кардан арындыру белән мәшгуль иде. «Безнең өстә тагын Бигеш, Түбән Кама юлларындагы күперләр. Шулай ук тукталышларны чистартабыз, юл билгеләрен карап торабыз», - ди биредә эшләүче Рамил Фәрдиев.

Карның нинди күләмдә явуына карамастан, юлда йөрүчеләргә юлларның һәрдаим чистартылып торуы мөһим. Ә бу юл хезмәтләренең тиз арада чара күрүеннән тора. Әле кыш башлана гына, сынаулар алда. Соңгы бозлавыкларда аварияләр дә күп булды. Юлның тиешенчә чистартылмаган булуы кеше гомерләре өзелүгә сәбәп булмасын иде.