Сугыш еллары балалары һәм тыл ветераннары дәүләттән аерым ярдәм сорый

Районда Бөек Җиңүнең 69 еллыгына багышланган бәйрәм митинглары 8 май көнне башланып китте һәм һәр авылда зурлап уздырылды. Сәмәкәйдәге митинг та, гадәттәгечә, истә калырлык, күңелләрне кузгатырлык итеп оештырылган иде. Тик бер генә нәрсә үкенечле - бәйрәмгә килгән ветераннарның саны гына елдан-ел күзгә күренеп кими. Әле берничә ел элек кенә биредә алар шактый иде. Быелгы тантанага нибары берсе - 89 яшьлек Мансур Гәрәев килә алды. Авылда яшәүче 94 яшьлек Ибраһим Сөләйманов, 89 яшьтәге Мөнәвир Салихов бәйрәмне өйләрендә генә каршылады.

Митингта катнашучыларны Сәмәкәй авыл җирлеге башлыгы Зиннур Сәгыйтов, «Ирек» хуҗалыгы җитәкчесе Рөстәм Хаҗиев, район хакимияте исеменнән «Якты юл» газетасы баш мөхәррире Инзилә Әхмәтгәрәева, мәктәп директоры Миргасим Галимҗанов, Сәмәкәй ветераннар советы җитәкчесе Гөлфирә Петрова җылы котлады. Алар үзләренең чыгышларында җиңү яулаган, илне җимереклекләрдән торгызган буын вәкилләренә олы рәхмәтләр, җылы теләкләр җиткерде. Сугыш елларында фронт тоткан өлкәннәр ул елларның авырлыгын, күз яшьләрен сөртә-сөртә искә алды.

- Сугыш башланганда миңа 13 яшь иде. Ач-ялангач килеш «Фронт өчен, җиңү өчен!» дип эшләдек. Ныгымаган иңнәргә күтәреп орлык ташу, урак уру калмады, колхозда бар авыр эш бала-чага, карт-коры җилкәсенә төште, - дип сөйләде Фаягөл Хәертдинова. - Хәзер барыбыз да олы яшьтә, ярдәмгә, кайгыртуга мохтаҗ. Беркайчан да үзебезгә аерым караш сорамадык. Бу ил белән килгән кайгы иде, без аны ил белән җиңдек. Әмма инде хәзер тыл ветераннары, сугыш еллары балалары да бик аз калып бара. Аларга дәүләттән ярдәм булсын иде.

Хезмәт ветераннары Рәүфә Хиҗалова, Гайнелҗинан Хәйретдинова да үз чыгышларында шушы фикерне әйттеләр. Митингта чыгыш ясаучыларның барысы да диярлек бүген Украинада барган вакыйгаларга борчылуларын белдерде. Фашизм яңадан баш калкыта - бу зур фаҗига. Күкләр аяз, илләр имин булсын, сугышлар кабатланмасын, дип теләде һәркем.

Митингта катнашучылар сугыш корбаннарын бер минут тын калып искә алдылар. Сәмәкәй мәктәбе укучылары бик матур музыкаль композиция әзерләгән иде. Авылның уртасында ук урнашкан һәйкәлгә чәчәк бәйләмнәре салынды. Балалар күккә тынычлык символлары - ак күгәрченнәрне очырды.