Сәмәкәй мәктәбендә беренче сыйныфка керүче балалар арткан

Районда бу уку елында барлыгы 3115 бала мәктәп партасы артына утырды, 326 укучы беренче сыйныфка керде. Сәмәкәй мәктәбендә узган тантаналы чарада барыбыз да быел беренче сыйныфка килүче балаларның саны ишәйгәнгә сөендек. Алма кебек тугыз кыз һәм малай. Дөрес, район күләмендә караганда күп түгел, зур мәктәпләрдә, әйтик, Бәткедә беренчегә - 40, Кнәздә - 51, Круглое Поледа 34 бала керде. Әмма Сәмәкәй мәктәбе өчен тугызы да алтын бөртеге кебек кадерле. Ни дисәң дә, хәзерге заманда балалар саны уку йортлары язмышын хәл итә. Соңгы елларда бу җирлектә сабыйларның саны арта баруы мәктәпнең дә, авылның да киләчәген өметле итә. Ә балалар саны арту күбрәк читтән кайткан ишле гаилә исәбенә икән. Авыл җирлеге башлыгы Зиннур Сәгыйтов әйтүенчә, Сәмәкәй җирлегеннән күп балалы гаиләләргә җир кишәрлекләре бүлеп бирелүдә балалар саны артуга уңай шарт булырга тиеш.

Тантаналы чараны мәгариф системасында 40 елдан артык эшләгән мәктәп директоры Миргасим Галимҗанов ачып җибәрде. Ул укучыларны, әти-әниләрне, педагогларны Белем көне белән тәбрикләде. Уку алдынгыларына, төрле бәйгеләрдә җиңгән укучыларга, укытучыларга Мактау кәгазьләре тапшырды. Миргасим Галимҗанович мәктәпнең яңа уку елына тулысынча әзер булын әйтте һәм әлеге уңайдан район башлыгы Васил Хаҗиевка рәхмәтләрен җиткерде. Соңгы берничә елда мәктәп урнашкан бинада шактый эшләр эшләнде, түбә ябылды, җылыту системасы, тәрәзәләр алыштырылгач сыйныф бүлмәләре җылынды. Хәзер спорт залын тәртипкә китерәсе калды. Бер түбә астына 6 оешма кереп урнашты, алар үзара ярдәмләшеп эшлиләр. Мәктәп директоры район җитәкчелеге тарафыннан авыл мәктәпләренә булган сак мөнәсәбәтне уңай бәяләде. Авыл җирлеге башлыгы Зиннур Сәгыйтов та яңа уку елы башлану уңаеннан авылдашларын ихлас тәбрикләде, ул да үз чыгышында мәктәп коллективы белән тыгыз элемтәдә эшләүләрен билгеләп үтте. Мин исә, үз чиратымда, район җитәкчелеге исеменнән котлау һәм тәбрикләү сүзләрен җиткердем. Яңа уку елы башланды, укучыларга да, педагогларга да уңышлар юлдаш булсын.