Кече Шилнә сайлауларга әзерләнә

2683нче сайлау участогының Кече Шилнә бүлекчәсендә сайлау материаллары урнаштырылган стенд һәм Дәүләт Думасы, партияләр турында мәгълүматлар тупланган китаплар һәркемнең игътибарын җәлеп итәрлек итеп сайлаучы почмагына тезеп куелган. Мәктәп түбәсендә җилфердәгән әләмнәр дә, капкадан керүгә ялт итеп торучы чакыру тактасы да сайлаучыларның күңеленә хуш килерлек. Физик мөмкинлекләре чикле авылдашлары өчен махсус баскыч (пандус) та ясап куйганнар. Шимбә көнне кабиналарны урнаштырып, сайлау участогын тулы әзерлеккә китерәчәкләрен дә әйтте 2683нче участок сайлау комиссиясе рәисе Галина Попова.

- Безнең җирлектәге халык элек-электән сайлауларда актив катнаша. Бәйрәмчә күтәренке күңел белән, иң матур киемнәрен киеп, балаларын, оныкларын җитәкләп киләләр. Иң кызыгы: һәр 4 ел эчендә авыл тормышы кинодагы кадрлар кебек күз алдында үтә, үзгәреп-алышынып тора. Әйтик, узган сайлауларда беренче тапкыр тавыш биргән кызларыбыз-егетләребезнең күбесе бүген инде яшь әниләр-әтиләр, балалар үстерәләр. Ул чакта мәктәптә укыган яшүсмерләр буйга җитеп балигъ булды, быел тәүге тапкыр сайлауларда катнашалар. Барлыгы 14 егет һәм кыз - югары уку йортлары, һөнәри белем бирү учреждениеләре студентлары. Аларның һәркайсы өчен истә калырлык бүләкләр әзерлибез, - дип истәлекләре-кичерешләре белән уртаклаша участок сайлау комиссиясе сәркатибе Гөлсем Муськина.

Районның балалар Дәүләт Думасы депутаты булган уку алдынгысы, мәктәпне иң яхшы билгеләргә генә тәмамлап, Түбән Новгород лингвистика университетына укырга кергән Римма Шәрипова да быел туган авылында беренче тапкыр сайлауларда катнашачак. Ә иң өлкән сайлаучы - 95 яшьлек Мария Наборщикова сайлау комиссиясе әгъзаларын өендә көтәчәк. Өлкән яшьтәге ялгыз әби-бабайлар, инвалид авылдашларының барысын да шулай өйләренә барып сайлатачаклар. 2683нче сайлау участогының Кече Шилнә бүлекчәсендә барлыгы 11 милләт вәкиленнән торган 800 сайлаучы Дәүләт Думасы депутатларына тавыш бирер дип көтелә. Сайлау участоклары иртәнге 8.00дән 20.00 сәгатькә кадәр эшләячәк. Алдагы сайлаулардан аермалы буларак, быел паспорттан тыш, хәрби билет, полиция органнары биргән шәхес таныклыгы да сайлауларда катнашу хокукын бирә. Сайлауларның барышын барлык фиркаләрдән дә күзәтчеләр күз уңында тотачак. Авыл кешесе үз язмышына да, ил язмышына да битараф түгел, бу сайлауларда да бөтен авыл бердәй булып сайлауларда катнашачагына ышана Кече Шилнәнең участок сайлау комиссиясе әгъзалары.