Солдатта булган дисеннәр

Элеккеге солдатлар белән хәзерге заман солдатлары бик күп нәрсә белән аерыла. Ике ел хезмәт урынына бер ел гына солдат боткасы ашау бәхете тия хәзер. Элек әниләр, бәлки улымнан хат килер дип, почтальон килгәнен күзләп торсалар, хәзер кәрәзле телефоннарын үзләреннән бер минутка да калдырмыйлар, хәбәр килүен белгертеп чыңлап куюга сискәнеп китәләр - бәлки улым «Whatsapp»ка, яисә «Вконтакте»га язгандыр, дип. Алай гына да түгел, әти-әниләр уллары янына армиягә «кунакка» да баралар. Бәтке авылыннан Наталья Рейнская нәкъ шундый сәфәрдән кайтты. Кичә аның улы Виталийга 22 яшь тулды. Ул Мәскәү өлкәсе Нарофоминск районында, Президент полкының Кавалерия мактаулы эскортында хезмәт итә.

- Улым армиягә кадәр кикбоксинг һәм бергә-бер көрәш белән шөгыльләнде. Шул аңа армиядә бик нык булыша, Виталий спорт взводында хезмәт итә.

Виталий Рейнскийның авылдашы, иң якын дусты, бергә балалар бакчасына, мәктәпкә йөргән, соңыннан көллияттә бергә укыган Юрий Струков та шул ук хәрби частьтә хезмәт итә, взводлары гына аерым. Юрийга 18 февраль көнне 22 яшь тулды. Наталья Рейнская аларны туган көннәре һәм 23 февраль белән шәхсән үзе котлады.

Ә Юрий белән Виталий, сагыну хисләренә бирелеп, үзләренең якташларына солдат хатлары килә торган шул «Whatsapp» аркылы бәйрәм котлавы җибәрделәр:

- Хөрмәтле якташларыбыз! Барыгызны да Ватанны саклаучылар көне белән тәбрик итәсебез килә! Һәммәгезгә дә, аеруча елдан-ел арабыздан сирәгәя барган ветераннарыбызга корычтай сәламәтлек телибез. Призывникларга үзләре теләгән хәрби частькә эләгүләрен, ә армиядә хезмәт итүчеләргә Ватан алдындагы бурычыбызны намус белән башкарып чыгуыбызны телибез. Дембель - котылгысыз, - дип яздылар алар.

Бәтке авылыннан Олег Аксаков исә Түбән Новгород өлкәсе Саров шәһәрендә Милли гвардиядә хезмәт итә. Әнисе Елена Николаевна көннәрне саный-саный сөекле улын көтә.
Олег армиягә үз теләге белән киткән, ныклап әзерләнгән - спорт белән шөгыльләнеп, мускулларын, егәрлеген, көчен ныгыткан. Бүгенге көндә ул кече сержант дәрәҗәсендә хезмәт итә.
- Аларга атнага бер мәртәбә телефон белән кулланырга рөхсәт итәләр. Командирлары бик кырыс, тәртип яратучы кеше. Бернинди «дедовщина», кыерсытулар юк, - ди ана кеше улының фотографияләрен күрсәтеп.

Олегка командирлары, хезмәт итүен контракт буенча дәвам итеп, «спецназ»га чакыра. Тик Бәтке егетенең тизрәк туган ягына кайтасы килә. Елена Николаевнаның өлкән улы хезмәт иткәндә Чечнядагы кайнар вакытларга эләккән, шуңадырмы, ана кеше көннәрне генә дә түгел, ә сәгатьләрне саныйдыр.

Круглое Поле поселогыннан Илсөяр Сыркина да инде икенче улын армиягә озаткан. Дмитрий Сыркин Йошкар-Ола шәһәрендә ракета гаскәрендә хезмәт итә. Туган ягында аны әти-әнисе генә түгел, ә хатыны, баласы да көтә. Яз көне алар бергәләп Дмитрий янына барырга җыеналар.
- Баланың иң матур, иң тәмле, иң кызык чакларын күрми кала бит, шуңа күрә барып кайтырга ниятлибез, - ди Илсөяр апа.
Биш бала анасы бүгенге көндә балалары белән горурланып яши:
- Безнең горурлыгыбыз алар, алдагы картлыкка терәгебез, шатлык-куанычларыбыз. Армия турында мин ике улымны һәрвакыт кисәтеп килдем. Бу сезнең бурычыгыз, тормыш мәктәбе, бабагыз сугышта катнашкан, әтиегез дә армиядә булды. Сезгә дә хәрби әзерлек узарга кирәк, дия идем, - дип сөйләде Илсөяр Хәбибовна.

Круглое Поле поселогы егете Ринат Фәрхетдиновның армиядән кайтканын иң зарыгып көткәне - аның 2 яшьлек сеңлесе.
- Көн дә абыйсының фотосын күрсәтәбез инде. Онытмасын дибез. Абыйсының армиядә икәнен белә үзе, стенада эленеп торган фотога карап үзенчә аңлата, - ди Ринатның әнисе Зөлфия Фәрхетдинова.
Ринат Мәскәү өлкәсе Калининец бистәсендә мотоукчы гаскәрендә хезмәт итә. Армиягә аны автомеханика техникумының 4нче курсында укыганда чакыралар. Академик отпуск алып, егет армиягә китә.
- Мөмкинлек булганда телефоннан гел язып тора улым. Фотоларын да җибәрә. Ашаулары да бик әйбәт ди, тәртип ягыннан да бар да тәртип ди. Бик сагынабыз инде. Беренче вакытларда гел күзгә яшьләр килә иде. Йөргән кызы бар Чаллыда. Бераз язмый торса, аннан сорыйм, сиңа язмадымы дип. Яки киресенчә ул миннән сорый, хәлләре ничек икән дип. Армиягә озатканда үзем дә артыннын ияреп барырдай булган идем, - дип сөйли Зөлфия апа.