“Гигант” белән “Биклән”дә – күп, “Ирек” белән “Камский”да – аз

Җәйнең матур, үләннәр мул булып үскән вакытында сыерлардан күп сөт алу өчен бөтен шартлар бар. Барлык хуҗалыкларда да җәйге лагерьлар яхшылап җиһазланды, сөтүткәргечләр урнаштырылды. Моңарчы "Чаллы яшелчәсе", Вилданов крестьян-фермер хуҗалыклары лагерьларында сөтнең сыйфатына карата шактый дәгъвалар булса, быелдан аларда сөтүткәргечләр куелды.

Терлекләрне лагерьларда яхшы итеп асрауны оештыру ягыннан "Гигант" һәм "Биклән" хуҗалыкларын үрнәк итеп куясы килә. Бу хуҗалыкларда көн эссесендә сыерларны ял иттереп, өстәмә азык белән тукландыралар, көн сүрелә төшкәч һәм төнлә көтү киң кулланыла. Шул рәвештә иҗади эшләгәч, көн саен һәр сыердан 18 килограммнан артык сөт савып баралар. Әмма Тукай азык-төлек корпорациясе, "Алмаз", "Мәләкәс" хуҗалыклары 12,8-13,4 килограммнан арттыра алмыйлар. Бу саннар уртача район күрсәткеченнән дә түбән. "Камский", "Ирек" хуҗалыклары узган елның 13 июненә караганда тулаем сөт җитештерүне киметтеләр. Моңа һич тә юл куярга ярамый. Чөнки табигать шартлары уңай, үләннәр күптөрле һәм мул. Малларны көтүне дөрес оештырганда, өстәмә туклануны зоотехник таләпләре кушканча кулланганда, җәен сөтне "Гигант" һәм "Биклән" хуҗалыклары дәрәҗәсендә җитештерә алабыз.