Безнекеләр беренче!

Зәрия Вәлиева, 1 июль 2021 - 16:29

1023

«Бу бозау йомшак уенчыкмы әллә?» Рәсемгә карауга шундый уй килә башка. Бу – тере бозау. Малкай С.Сәйдәшев исемендәге авыл хуҗалыгы предприятиесендә асрала торган голштино-фриз токымлы өч айлык тана бозау. Аның янәшәсендә – С.Сәйдәшев исемендәге хуҗалыкта сыер фермасында практика узучы кыз Адилә Солтанова.

Малкай, бозау караучы Адилә белән озын юл үтеп Казанда 1-3 июльдә үткәрелә торган «Агроволга-2021» халыкара агросәнәгать күргәзмәсендә катнашты. Халыкара күргәзмәдә Адилә Солтанова голштино-фриз токымлы мөгезле эре терлекләрне тәкъдим итү бәйгесендә беренче урынны алды. Конкурста барлыгы 12 бозау катнашты. Яшүсмер кыз үзе карамагындагы бозауларны ихластан тәрбияли: маллар вакытында ашатыла-эчертелә, саф һавага чыгарыла, гигиена процедуралары ясала – душ астында тәннәре юдыртыла. Шуңа да алар шалкан сыман йоп-йомры, мехлары ялтырап тора. «Адиләнең кулы эшкә ятып тора. Мал-туар белән эшләүче кешедә булырга тиешле сыйфатлар бар аңарда. Бозаулар аның һәр сүзен аңлыйлар сыман», – диләр С.Сәйдәшев исемендәге хуҗалыкта.
Күргәзмәдә Россиянең 30 регионыннан 300 оешма катнаша, шулай ук дөньяның төрле илләреннән агросәнәгать өлкәсендә эшләүчеләр була.