Татарстанда СВО катнашучыларына 20 дән артык ярдәм чарасы каралган

Мәсәлән, СВОда катнашу чорына бәйле иминият стажы һәм пенсия коэффициентлары Социаль фондка килгән мәгълүматлар нигезендә автомат рәвештә исәпләнә. Шулай ук сугышчан хәрәкәтләр ветераннарына тиешле айлык түләүләр дә гаризасыз билгеләнә.

Махсус хәрби операциядә катнашучылар өчен пенсия хокукларын исәпләгәндә аерым тәртип кулланыла. СВО зонасында хезмәт иткән вакыт иминият стажына икеләтә күләмдә кертелә: бер ел хезмәт ике ел стажга тиңләштерелә. Моннан тыш, катнашучыларга арттырылган пенсия коэффициентлары исәпләнә — бер ел өчен 3,6 коэффициент билгеләнә. Бу чор озак еллар хезмәт иткән өчен вакытыннан алда пенсиягә чыгу хокукын билгеләгәндә дә исәпкә алына.

Татарстанда сугышчан хәрәкәтләр ветераннарына ай саен 4 838 сум күләмендә акчалата түләү билгеләнә. Россия Геройлары өчен бу түләү күләме 103 693 сум тәшкил итә. Әлеге ярдәм чаралары дәүләт органнары арасындагы мәгълүмат алмашу нигезендә автомат рәвештә рәсмиләштерелә.

Хезмәт вакытында җәрәхәт алган СВО катнашучылары инвалидлык төркеменә карап айлык компенсация алырга хокуклы. Аларга шулай ук шәхси реабилитация программасы нигезендә кирәкле техник чаралар бирелә. Мондый ярдәмне алу өчен электрон сертификат та медицина-социаль экспертиза мәгълүматлары нигезендә гаризасыз рәсмиләштерелә.

СВОдан кайткан хәрбиләр Социаль фонд карамагындагы үзәкләрдә медицина тернәкләнүе һәм санаторий-курорт дәвалавы уза ала. Моның өчен ветеран таныклыгы һәм дәвалану кирәклеген раслаучы документлар кирәк. Шулай ук фонд дәвалану урынына барып кайту өчен юл чыгымнарын компенсацияли.

«Безнең төп максат — махсус хәрби операциядә катнашучылар һәм аларның гаиләләре тиешле ярдәмне тиз һәм уңайлы рәвештә ала алсын өчен шартлар тудыру. Күпчелек түләүләр гаризасыз, автомат рәвештә билгеләнә. Шуңа күрә һәркем үз хокукларын белергә һәм алардан файдалана алырга тиеш», — дип билгеләп үтте Татарстан буенча Социаль фонд бүлеге идарәчесе Эдуард Вафин.

Реабилитация үзәкләрендә дәвалану өчен гаризаны Татарстан Социаль фондының теләсә кайсы клиент хезмәтендә яки «Дәүләт хезмәтләре» порталы аша бирергә мөмкин.

Түләүләр, ташламалар һәм башка ярдәм чаралары турында тулы мәгълүматны Россия Социаль фондының рәсми сайтында һәм социаль челтәрләрдәге аккаунтларында табарга була.

Өстәмә сораулар буенча гражданнар 8 800 100 0001 телефоны аша бердәм контакт-үзәккә мөрәҗәгать итә ала. Линия тәүлек әйләнәсенә эшли, шалтырату бушлай.

Фото һәм мәгълүмат/ РФ Социаль фонды ТР бүлекчәсе