МХО ветераннары өчен яңа һөнәри мөмкинлекләр ачыла

Очрашуда сугышчылар үзләрен борчыган сорауларны профильле ведомство вәкилләренә турыдан-туры бирә алды. Катнашучылар арасында аеруча  яңа һөнәр үзләштерү буенча тәкъдим ителгән программалар зур кызыксыну уятты. Бу хакта Тукай районы буенча Халыкны эш белән тәэмин итү үзәгенең гражданнарны кабул итү бүлеге җитәкчесе Эльмира Хәкимова сөйләде. Аның сүзләренә караганда, бүген МХО ветераннары өчен хезмәт базарында ихтыяҗ зур булган 200дән артык белгечлек буенча белем алу мөмкинлеге бар.

«Кадрлар» милли проекты кысаларында укыту тулысынча бушлай үткәрелә һәм һәр кешенең мөмкинлекләрен исәпкә алып оештырыла.

Белем бирү программаларыннан тыш, социаль яклау органнары белгечләре ветераннарга дәүләт ярдәме чаралары турында да җентекләп аңлатты. Аерым алганда, урында ук социаль контракт төзү тәртибе турында мәгълүмат бирелде. Әлеге ярдәм механизмы үз эшен башлап җибәрергә яки эшкә урнашканда финанс ярдәме алырга мөмкинлек бирә.

Очрашуда «Прибрежный» бакчачылык ширкәтендә яшәүче запастагы офицер, МХО ветераны Иван Левкин да катнашты. Мобилизациягә кадәр ул тренер-укытучы һәм төзүче булып эшләгән. Әмма авыр җәрәхәт алу һәм аякларына протез куелу сәбәпле, элеккеге физик хезмәтенә кире кайту мөмкинлеге булмаган. Шулай да ул бирешмәгән һәм тыныч тормышта үзенә яңа юл табу нияте белән ярминкәгә килгән. Аның максаты – пилотсыз очу аппаратлары операторы һөнәрен үзләштерү һәм Ватанга заманча технологияләр өлкәсендә хезмәт итүне дәвам итү.

«Алган җәрәхәт аркасында элекке һөнәрләрем буенча эшли алмыйм. Әмма очрашуда мәшгульлек үзәге аша пилотсыз очу аппаратлары операторы һөнәренә укырга мөмкин икәнен белдем. Бу юнәлеш миндә зур кызыксыну уятты. Хәзер шул мөмкинлек турында җитди уйлыйм, үзәк белгечләре белән аерым очрашырга җыенам», – дип уртаклашты Иван Левкин.

Заманча технологияләр белән бәйле юнәлешләрдә Ватанга хезмәт итәргә теләгән ветераннар өчен бүгенге көндә яңа мөмкинлекләр барлыкка килә. Россиядә пилотсыз системалар гаскәрләрендә контракт буенча хезмәт итү перспективалы һәм мөһим юнәлешләрнең берсе буларак үсеш ала. Бу өлкә ветераннарга үз тәҗрибәләрен файдаланырга, яңа күнекмәләр үзләштерергә һәм ил иминлеген тәэмин итүгә үз өлешләрен кертергә мөмкинлек бирә.

Бу хезмәтнең төп үзенчәлеге – билгеләнгән бүлекчәләрдә генә хезмәт итү гарантиясе. Әлеге гаскәрләр белән контракт төзегән хәрбиләр бары тик Пилотсыз системалар гаскәрләре составында хезмәт итә. Аларны мотоукчы яки башка төр гаскәрләргә күчерү каралмаган, күчерүләр бары тик шул ук гаскәрләрнең бүлекчәләре арасында гына мөмкин.

Монда пилотсыз аппаратлар операторларыннан тыш, инженерлар, техниклар, материаль-техник тәэминат белгечләре, йөртүчеләр һәм склад хезмәткәрләре дә кирәк.

Хезмәтне башлар алдыннан барлык контрактчылар кимендә ике ай дәвамында уку үзәкләрендә мәҗбүри әзерлек үтә. Тагын бер мөһим үзенчәлек – контракт нәкъ бер елга төзелә һәм аның вакыты чыкканнан соң автомат рәвештә озайтылмый.

Татарстан Республикасы Ватан сакчыларына күрсәтелә торган матди ярдәм күләме буенча лидерларның берсе булып кала. 2026 ел башыннан Россия Саклану министрлыгы белән контракт төзегәндә бер тапкыр бирелә торган түләү күләме республикада рекордлы 2,9 миллион сумга кадәр арттырылды.

Мондый күләмле финанс ярдәме һәм «Кадрлар» милли проекты кысаларында заманча һөнәрләргә өйрәнү мөмкинлеге Тукай районы ветераннары өчен яңа юллар ача. Бу аларга яңа юнәлеш үзләштерергә, эш табарга һәм илгә хезмәт итүләрен дәвам итәргә ярдәм итә.