Тукай районында ике көндә исерек хәлдә рульгә утырган дүрт кешене тоткарлаганнар

Беренче очракта Чаллы – Сарман автомобиль юлының беренче чакрымында Mitsubishi Lancer машинасын йөртүче 26 яшьлек Алабуга кешесен тикшергәннәр. Инспекторлар егеттән алкоголь исе килгәнен сизгән. Алкотестер 0,623 мг/л күрсәткән, машина йөртүче чыгарылган нәтиҗә белән килешкән. Аңа карата беркетмә төзелгән, ә автомобиль махсус тукталышка урнаштырылган.

Шул ук көнне Игенче авылында Hyundai автомобилен туктатканнар. Руль артында Чаллыда яшәүче 49 яшьлек ир-ат булган. Алкотестер 0,418 мг/л күрсәтсә дә, ул бу күрсәткеч белән ризалашмаган. Шуңа күрә аны Чаллының наркология диспансерына медицина тикшерүе узарга җибәргәннәр. Тикшерү ирнең исерек булуын раслаган. Ир-ат беркетмә белән килешкән, аның машинасын штрафстоянкага алып киткәннәр.

17 октябрьдә Новотроицк авылында тагын ике исерек машина йөртүче ачыкланган. Аларның берсе — Чаллыда яшәүче 40 яшьлек хатын-кыз. Алкотестер аның канында 0,609 мг/л алкоголь булуын күрсәткән. Икенчесе — 43 яшьлек җирле ир-ат, аның күрсәткече 0,286 мг/л тәшкил иткән. Икесе дә прибор нәтиҗәләре белән ризалашкан. Аларга карата исерек хәлдә машина йөрткән өчен беркетмәләр төзелгән.