Бәйрәм белән, хөрмәтле райондашлар!

Барыгызны да Халыклар бердәмлеге көне белән чын күңелдән котлыйм. Халыклар бердәмлеге көне ерак ата-бабаларыбызның каһарманлыгына баш ию генә түгел. Халыклар бердәмлеге гомер-гомергә Россиянең төп милли көче булды. Халыклар, мәдәниятләр, диннәр бердәмлеге - җиребездә тынычлык һәм татулык нигезе ул. Тарихи гореф-гадәтләрне саклау, төрле телләрдә сөйләшүче, төрле дин тотучы, төрле караштагы кешеләрнең мәдәниятенә, теленә хөрмәт тәрбияләү үтә дә мөһим. Бу җәмгыятьтә тотрыклылык һәм дуслыкны тәэмин итүгә этәргеч ясый да инде.

Көчле Россиянең төп шарты - ул халыклар бердәмлегендә. Бүген без, бабаларыбызның бөек батырлыкларына таянып, игътибар үзәгендә кеше һәм граждан торган дәүләт төзибез. Бу мөһим эштә безгә ил, республика, район эшләрен алып баруда кызыксыну уяту, барлык кешеләр файдасына хезмәт кую, гражданнарның үз карарлары һәм гамәлләре өчен җавап бирергә әзер булу принципларына таянырга кирәк.

Бүгенге көндә районыбыз һәм, гомумән, республикабыз социаль-икътисади үсеш юлыннан ышанычлы атлый. Соңгы вакытта күп кенә заманча җитештерелгән корылмалар сафка басты, спорт һәм мәдәният үзәкләре куллануга тапшырылды. Болар барысы да киләчәккә якты өмет, ышаныч тудыра.

Илебез тарихында зур әһәмияткә ия булган әлеге бәйрәм белән тәбрик итәм. Сезгә уңышлар, тынычлык, бәхет, бәрәкәт юлдаш булуын телим.