Иске обой өстенә яңасын ябыштырырга ярыймы?

автор, 6 апрель 2017 - 11:10

2559

Иске обой, әгәр бик юка кәгазьдән икән, диварга куптарып алынмаслык булып ябышырга мөмкин. Бары тик иске обойның купмаячагына тулы ышаныч булганда гына аның өстенә яңасын ябыштырырга мөмкин. Ә яңа обой куба башласа, бердәнбер юл кала - обойны яңадан ябыштыру.

Әгәр дә обойда һава куыклары барлыкка килсә, бераз көтеп карагыз, гадәттә, алар 2-3 көннән үзеннән-үзе бетә. Шуңа күрә аларны шунда ук бетерергә керешергә кирәкми. Берничә көн эчендә юкка чыкмасалар һәм әллә ни күп булмасалар, обойны кызу үтүк белән үтүкләп карарга мөмкин. Әгәр дә мондый куыклар күп мәйданны каплап алган булса һәм үзеннән-үзе бетмәсә, обойны яңадан ябыштырырга туры киләчәк, ә иң элек дивардан иске обойны куптарып алырга кирәк булачак.

Мондый мәшәкатькә юлыкмас өчен, яңа обой ябыштырыр алдыннан иске обойны куптарып алу зарур. Аның бик гади ысулы бар: төзелеш кибетләрендә обой куптару өчен махсус сыеклыклар сатыла. Аны киң пумала белән иске обойга сылап, 5 минут көтәргә кирәк. Шуннан соң обой бик җиңел кубарылачак.