Ватсааптагы тормыш, яки Су проблемасын кем хәл итәр?
Авыл халкы рәхәткә чыкты, чыбыксыз телефон аша аралаша хәзер. Сигез яшьлеге дә, сиксән яшьлеге дә кулына смартфон тотып утыра. Кайчандыр халык телендә «чыбыксыз телефон»нан бер-ике көн килгән хәбәр инде минуты, секунды белән килеп ирешә. Әле алай гына да түгел, кайсы гына авылга барма, биредә яшәүчеләр ватсаап төркемнәре ачып, проблемаларын хәл итәләр, авыл ялт иткәнче кемнең кайда ни эшләп йөргәнен белә. Гайбәте дә, әйбәте дә ватсаапта. Авылга гаишниклар килсә дә, көтүдән берәүнең сыеры качса да, кибеткә шәп товар кайтса да бөтенесе ап-ачык.
