Полиция Кыш бабае бүләкләр таратты
Яңа ел алдыннан һәркайсыбыз күңел түрендә сакланган якты хыяллар тормышка ашар, нинди дә булса могҗиза булыр, дип өметләнә. Бала-чага аеруча ярата бу сихри чорны, Кыш бабайга хат яза, зур түземсезлек белән бүләкләр көтә. Теләнче Тамак интернат-мәктәбе укучыларына: «Кыш бабайны күрсәң, нинди теләкләреңне әйтер идең?» дигән сорауны биргәч, төрле җаваплар яңгырады. Гаҗәеп, ләкин планшет яисә кыйммәтле телефон сораучы булмады. Кемнеңдер иң зур теләге – әти-әни булган гаиләдә яшәү, кемдер әнисенә сәламәтлек тели, энесенә, сеңлесенә бүләк алып бирергә хыяллана. Бер кыз бала исә: «Мин Кыш бабайдан зур эт сорар идем», – дип җавап бирде.
