90 яшьлек Гандәлиф Гыйлаҗиева: «Мин тормышка гашыйк»
Ул төп-төз басып тора, матур әдәби телдә сөйләшә, аның җылы һәм бер үк вакытта сынаулы карашы, әйтерсең лә, синең барлык яшерен уйларыңны күрә – Гандәлиф Гыйлаҗи кызы Гыйлаҗиеваның 42 ел укытучы булып эшләгәне аның һәрбер хәрәкәтеннән, үз-үзен тотышыннан аңлашыла. Зыялы, һәр сүзе урынлы, тормыш бизмәнендә үлчәнгән. Шул ук вакытта, укытучыларга хас җитдилек, таләпчәнлек аңа шаян, чая, җор сүзле булырга комачауламый. 90 яше тулу уңаеннан Гандәлиф апаны район башлыгы урынбасары Рөстәм Закиров, Түбән Суыксу авыл җирлеге башлыгы Флүр Ихсанов, район мәгариф идарәсе башлыгы урынбасары Эльвира Шәйдуллина, туганнары, хезмәттәшләре, укучылары котларга җыелды.
