Исерек килеш рульгә утыручыларны мәҗбүри эшкә хөкем иттеләр
Тукай районы суды ике кешегә карата хөкем карары чыгарды. Алар, моңа кадәр дә полиция хезмәткәрләре тарафыннан тоткарланган булган. Үзләренә карата билгеләнгән чикләүләр булуга карамастан, кабат исерек хәлдә рульгә утырганнар. Хәзер бу гамәлләре өчен җинаять җаваплылыгына тартылган.
Моңа кадәр дә исерек килеш машина йөрткәне өчен җавапка тартылган ир-атка ул вакытта 30 мең сум штраф салынган һәм 1 ел 7 айга машина йөртү таныклыгыннан мәхрүм ителгән. Әмма 2026 елның 6 мартында ул яңадан исерек хәлдә рульгә утырган. Аны ГАИ хезмәткәрләре райондагы бер дача территориясендә тоткарлаган. Суд аны гаепле дип танып, 200 сәгать мәҗбүри эш билгеләгән һәм ике елга машина йөртү хокукыннан мәхрүм иткән.
Икенче ир-атның да тарихы шуңа охшаш: аңа 45 мең сум штраф салынган, 1,5 елга машина йөртү таныклыгы алынган булган, болардан тыш ул медицина тикшерүеннән дә баш тарткан. Узган елның 18 сентябрендә аның машинасын трассада туктатканнар. Тикшерү аның кабат исерек хәлдә булуын раслаган. Бу кабат хокук бозуны исәпкә алып, суд аңа да 200 сәгать мәҗбүри эш һәм ике елга машина йөртү хокукыннан мәхрүм итү җәзасын билгеләгән.
Гомумән алганда, закон исерек килеш кабат рульгә утырган кешеләргә мәҗбүри эш, 300 меңгә хәтле штраф яки ике елга кадәр иректән мәхрүм итү җәзасы да карарга мөмкин. Аерым очракларда машинаны да дәүләт файдасына алырга мөмкиннәр.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев