2024 елның октябрендә Тукай районында яшәүче гади генә мәктәп укучысы Камил Кусаевның исеме республика матбугат чаралары һәм телеканалларында яңгырады. Ул вакытта бөтен республика аның олы кеше кебек кабул иткән карарын — үзенең беренче һәм яраткан квадроциклын фронттагы сугышчыларга бирүен — зур кызыксыну белән күзәтте. Ике елга якын вакыт узгач, без яшь геройның бүгенге тормышы белән кызыксындык. Хәзер 14 яшьлек Камил — абруйлы кадет авиация корпусында белем алучы курсант. Ул инде өч тапкыр парашют белән сикергән һәм самолет штурвалы артында чын практика үткән.
«Мин парашют белән өч тапкыр сикердем инде
һәм моның белән генә тукталырга җыенмыйм»
Камил кадет корпусына зур конкурсны уңышлы үтеп, сигезенче сыйныфка укырга кергән. Аның сүзләренчә, күккә күтәрелү хыялы балачактан ук күңелендә яшәгән. Бүген исә бу хыял әкренләп чынбарлыкка әверелә.
Бу уку йортында булачак хәрби очучыларны әзерләү программасы җиңелләрдән түгел. Әмма нәкъ менә катгый тәртип, физик әзерлек һәм зур җаваплылык шартларында характер чыныга. Чын очышларга кадәр курсантларга зур күләмдә теория үзләштерергә һәм пилотлык күнекмәләрен җирдә, шул исәптән махсус тренажерларда камилләштерергә туры килә.
«Миңа хәзер 14 яшь, һәм мин үз максатыма ныклы адымнар белән барам, — ди курсант Камил Кусаев. — Училищеда беренче җитди практикам да булды: махсус самолет-тренажерларда очышларны шомарттым. Хисләрне сүз белән генә аңлатып булмый, кабина тулысынча чын самолетны хәтерләтә. Мин парашют белән өч тапкыр сикердем инде һәм моның белән генә тукталырга җыенмыйм. Төп максатым — укуны тәмамлагач, Краснодар югары хәрби авиация училищесына керү. Чын офицер юлы һәм һөнәри үсешем нәкъ менә шуннан башланачак».
Камилнең тормышы шактый үзгәргән. Авылдагы тыныч каникулларны катгый көн тәртибе, устав таләпләре һәм физик әзерлек алыштырган. Буш вакытында йөрү өчен моторлы техника урынына хәзер ул гади велосипед куллана. Камил моңа да җитди карый: велосипед — физик форманы яхшы саклау өчен менә дигән мөмкинлек, чыгымнары да күпкә азрак.
«Квадроциклым белән аерылу миңа бөтенләй авыр булмады»
14 яшьлек егетнең мондый җитди карашы очраклы түгел. 2024 елның октябрендә Тукай районының җиденче сыйныф укучысы Камил Кусаевның исеме республика массакүләм мәгълүмат чараларында күп яңгырады. Сәбәбе — аның чыннан да өлкәннәрчә җаваплы карар кабул итүе иде.
2024 елның җәендә Камил әти-әнисеннән беренче квадроциклын алып бирүләрен сораган. Әнисе улының иминлеге өчен борчылып озак икеләнгән, әмма Камил куркынычсыз модельне үзе эзләп тапкан һәм әти-әнисен ризалаштырган. Җәй буе дүрт тәгәрмәчле техника аның иң зур горурлыгы булган. Көз көне әнисе Камилгә махсус хәрби операция зонасындагы сугышчыларга мобиль техника ни дәрәҗәдә кирәк булуы турында видеоролик күрсәткән.
«Әнием квадроциклымны СВОда катнашучы егетләргә тапшырырга тәкъдим итте, һәм мин шунда ук ризалаштым, — дип искә ала Камил. — Уку елы башлана иде, миңа дәресләргә һәм китапларга күбрәк игътибар бирергә кирәклеген аңладым. Ә анда бу техника кемнеңдер гомерен саклап калу өчен кирәк булырга мөмкин иде. Квадроциклым белән аерылу миңа бөтенләй авыр булмады, чөнки мин моны ни өчен эшләвемне ачык аңладым».
Ул вакытта Камилнең бу адымы күпләр өчен бала күңеленнән чыккан көтелмәгән изге гамәл кебек кабул ителде. Бүген исә инде кадет авиация корпусында белем алучы курсантка карап, квадроциклын тапшыру карарының аның тормышындагы җаваплылык һәм бурыч төшенчәләрен аңлауда беренче җитди адым булганын күрәсең.
«Мин аны туганнан бирле «хәзинәм» дип йөртәм»
Кадет тормышының катгый тәртибе, парашюттан сикерүләр һәм көндәлек авыр күнегүләр аның холкын ныгытса да, Камил туган йортына кайтуга ук ярдәмчел һәм игелекле балага әйләнә. Аны өйдә әти-әнисе һәм әбисе сагынып көтә. Әбисе булачак очучыны яратып «Камилем» дип йөртә. «Мин аны туганнан бирле «хәзинәм» дип йөртәм! Гаилә-безнең бөтен өметен аңа баглыйбыз, — ди горурлык яшьләре белән Камилнең әбисе.
— Ул иртән тора да шунда ук минем янга йөгереп килә: «Әбием, бүген нәрсә эшлибез?» — ди. Өйдәге һәм бакчадагы авыр эшләрнең барысын да үзе башкара. Әти-әнисен бик хөрмәт итә, ярдәм сораган кешене беркайчан да кире какмый».
Камил училищеда күк киңлекләрен өйрәнгәндә, аның гаиләсе туган җирендә ныклы тыл булып кала. Яшь курсант махсус хәрби операция зонасындагы яңалыкларны даими күзәтеп баруын әйтә. Камилнең холкы гаилә тәрбиясе, туган җиргә мәхәббәт һәм җаваплылык хисе белән формалашкан. Мондый егетләрдән киләчәктә чын офицерлар — Ватан күген саклаучы белгечләр үсә.
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев