Казанның «Гаилә» мәчете сигезенче тапкыр республика күләмендә «Нәселебез шәҗәрәсе» бәйгесен уздыра

Казанның «Гаилә» мәчете республикада сигезенче тапкыр «Нәселебез шәҗәрәсе» бәйгесен уздыра. Гран-при иясе төп бүләк итеп Гомрә хаҗына юллама алачак, дип хәбәр итте «Гаилә» мәчете имам-хатыйбы Рөстәм хәзрәт Хәйруллин узган матбугат очрашуында. Хәзрәт билгеләп үткәнчә, бәйге иң беренче чиратта гаилә кыйммәтләрен саклау һәм яшь буынны нәсел тарихы белән кызыксынуын арттыруга юнәлдерелгән.

«Үткәнебезне белмичә – киләчәгебез юк. Елдан-ел бәйгедә катнашучылар саны арта. Җиде буын әби-бабаларыбызны, ерак туганнарны танып белү – бик изге эш. Сөекле Пәйгамбәребез Мөхәммәд (с.г.в.): «Кем шушы дөньяда хәерле тормыш теләсә, туганлык җепләрен өзмәсен», – дип әйткән», – диде Рөстәм хәзрәт.

Бәйгегә әзерләнү шартлары
Оештыру комитетына гаилә шәҗәрәсе, нәсел тарихы буенча бер битлек инша, материалларны әзерләүче турында белешмә һәм фотосурәтләрне тапшыру кирәк. Эшләрнең формасына чикләүләр юк, әмма алар тарихи документлар белән расланырга тиеш – уйдырма «әкият шәҗәрәләре» кабул ителми.

«Бәйге фәнни һәм тарихи эшчәнлеккә юнәлдерелгән. Кемдер шәҗәрәне рәсем, кемдер IT-технологияләр ярдәмендә, ә кемдер электрон форматта ясый ала. Яшь чикләүләре дә юк. Әмма барлык хезмәтләр дә дәүләт архивы документлары белән расланырга тиеш», – дип аңлатты имам-хатыйб.

ТР Дәүләт комитетының архив документларыннан фәнни файдалану һәм халыкара элемтәләр бүлеге башлыгы Айсылу Галиева киңәш иткәнчә, архив мәгълүматларын алу өчен әзерлекне 6–7 ай алдан башлау яхшы. Туган һәм вафат булган елларын белү өчен документлар 770 сум, гаилә составы турында белешмә – 1540 сум тора.

Мөһим даталар һәм тапшыру юллары
Бәйгегә эшләр 20 майга кадәр кабул ителә. Нәтиҗәләр 27 майда – Корбан гаете көнне игълан ителәчәк. Эшләрне 420025, Казан, Җәүдәт Фәйзи урамы, 2 йорт адресы буенча тапшырырга яки электрон рәвештә kitaphane.gailya@yandex.ru адресына җибәрергә мөмкин.

Бәйге ТР Мөселманнары Диния нәзарәте, «Мөселманнар» газеты, ТР Архив эше буенча дәүләт комитеты, ЗАГС идарәсе, РФ Мөселман эшмәкәрләре ассоциациясе һәм «Гаилә һәм мәктәп» журналы ярдәме белән оештырыла.

Фото һәм мәгълүмат Татар-Информ мәгълүмат агентлыгыннан алынды