2026 елда пенсияләр ике тапкыр артачак: 1 августтан эшләүче пенсионерларның иминият пенсиясе, тупланма һәм срочлы түләүләре яңадан исәпләнә, ә 1 октябрьдән хәрби пенсияләр индексация уза. Барлык арттырулар автомат рәвештә башкарыла, гариза бирү таләп ителми.
Яңадан исәпләү һәм индексация — пенсияне арттыруның ике төрле механизмы. Яңадан исәпләү пенсионерның шәхси күрсәткечләренә бәйле: стаж, хезмәт хакы, иминият кертемнәре исәпкә алына, шуңа күрә өстәмә сумма һәр кешегә аерым чыга. Индексация исә дәүләт тарафыннан билгеләнә һәм инфляция йогынтысын каплау өчен бер үк төр пенсия алучыларга бердәй процентта кулланыла.
Эшләүче пенсионерларның пенсиясе 2026 елның августында яңадан исәпләнә. Әгәр кеше 2025 елда эшләгән булса һәм аның өчен иминият кертемнәре түләнгән икән, пенсиясе автоматик рәвештә арта.
Әгәр кертемнәр булмаса, аерым исәпләү ясалмый — бары тик гомуми индексация генә кала. Өстәмә 3 пенсия баллы белән чикләнә. 2026 елда 1 балл 156,76 сум булганда, иң зур арту якынча 470 сумга кадәр генә була. Рәсми эштә эшләмәүчеләргә һәм социаль пенсия алучыларга бу артулар кагылмый.
Тупланма пенсияләр һәм срочлы түләүләр ел саен яңадан карала һәм аларның күләме инвестиция керемнәренә бәйле. Гомерлек тупланма пенсияләр якынча 17% ка, ә срочлы түләүләр — якынча 19% ка арта. Бу система 2002–2013 елларда эш бирүчеләр түләгән кертемнәр исәбенә формалашкан. Уртача тупланма пенсия якынча 1600 сум булганда, арту 276 сум тирәсе тәшкил итә, срочлы түләүләр (уртача 3000 сум) 579 сумга кадәр күтәрелергә мөмкин.
Хәрби пенсияләр 1 октябрьдә индексацияләнә. 2026 елда арту якынча 4% булуы ихтимал, мәсәлән, 35 000 сум пенсия якынча 36 400 сумга кадәр җитә ала.
Пенсия артуның төрле юллары бер-берсенә комачауламый, шуңа күрә бер кеше берничә төр өстәмә дә алырга мөмкин. Мәсәлән, эшләүче пенсионер да, тупланма өлеше булган кеше дә, хәрби пенсионер да ел дәвамында төрле вакытта өстәмәләр ала. Ләкин моның өчен төп шарт — эш бирүчеләрнең кертемнәрне дөрес тапшыруы һәм пенсионерның шәхси счетындагы мәгълүматның төгәл булуы. Тупланма пенсияләр исә бары тик инвестиция кереме булганда гына арта.
Чыганак/ Российская газета
"Якты юл" газетасына язылыгыз һәм Тукай районындагы яңалыкларны, вакыйгаларны белеп торыгыз
Нет комментариев