21 июльдән бердәм пособие алу тәртибе үзгәрә

21 июльдән бердәм пособиегә гаризаларны караганда, Россия Социаль фонды эшләми торган, әмма хезмәткә яраксыз кешеләрне карау белән шөгыльләнүче гражданнарга карата яңа таләпләр кертәчәк. Хәзер мондый сәбәп аркасында керем булмау кеше үзенең якын туганын караган очракта гына исәпкә алыначак. Бу хакта СФР матбугат хезмәте хәбәр итте.

Яңа тәртип I төркем инвалидларны, 80 яшьтән өлкән кешеләрне һәм даими ярдәм кирәк булган өлкәннәрне караучыларга кагыла. Моның өчен гариза бирүче белән каралган кеше арасында якын туганлык булырга тиеш.

Якын туганнар исемлегенә ир һәм хатын, әти-әни, балалар, абый-апалар, сеңелләр, бабайлар, әбиләр һәм оныклар керә. Әгәр кеше бу исемлеккә кермәгән кешене караса, аның рәсми кереме булмавы пособие билгеләгәндә сәбәп буларак кабул ителмәячәк. Элек мондый таләп юк иде.

Карау вакытына да үзгәрешләр кертелде. Бу чор исәпкә алыныр өчен, ул кимендә 10 ай дәвам итәргә тиеш. Әгәр вакыт азрак булса, пособие исәпләгәндә керем таләпләре карау булмаган айларга карап билгеләнәчәк.

Тагын бер яңалык — даими теркәлү урыныннан башка бирелгән гаризаларга кагыла. Хәзер Социаль фонд мондый очракларда кешенең чынлыкта кайда яшәвен тикшерәчәк.

Ведомство белдерүенчә, кирәкле мәгълүматларның күбесен белгечләр үзләре алачак. Шуңа күрә гражданнарга өстәмә документлар тапшырырга кирәк булмаячак.

Бердәм пособие гаиләнең керемнәрен, мөлкәтен һәм эшкә сәләтле әгъзаларның рәсми кереме булу-булмавын тикшергәннән соң билгеләнә.

Чыганак/ РИА Новости