Юл һәлакәтендә тукайлы зыян күрә

Мәскәү шәһәре ягына хәрәкәт итүче Шевроле Авео автомобиле белән идарә итүче 1989 елгы ир-ат, тиешле дистанция сакламыйча, алда торган 1958 елгы ир-ат идарә иткән Лада Калина автомобиленә килеп бәрелә. Шуннан соң, каршы як хәрәкәте полосасына чыгып, Уфа ягына юл тотучы 1952 елгы ир-ат идарә иткән Лада Приора автомобиленә килеп бәрелә. Юл-транспорт һәлакәтеннән соң Калина автомобиле хуҗасы үз машинасын һәлакәт булган урыннан ала. Ул административ хокук бозу Кодексының 12.27 маддәсе нигезендә (1нче бүлеге) җаваплылыкка тартылды, дип хәбәр итә район ЮХИДИ хезмәте.
Шевроле автомобиле белән Яр Чаллы шәһәре кешесе, Калина автомобиле белән Минзәлә районы кешесе идарә иткән. Лада Приора автомобилендә исә Тукай районы Татарстан совхозы поселогында яшәүче 66 яшьлек ир-ат хәрәкәт иткән. Юл-транспорт һәлакәте нәтиҗәсендә аның бот сөяге сына һәм ул «03» хезмәте ярдәмендә Яр Чаллы шәһәренең Ашыгыч медицина ярдәме дәваханәсенә озатыла.

Фото ЮХИДИ хезмәтеннән бирелде.