Яшим дип җиң сызганып яшәгән кешегә авылда шөгыль җитәрлек
Районда авыл җыеннары үткәрү, анда башкарылган эшләр, көнүзәк мәсьәләләр, хәл итәсе проблемалар турында халык белән уртага салып сөйләшү гадәткә керде. Быел да, шул традицияне дәвам иттереп, берләштерелгән җыеннар үткәрелә башлады. Биклән, Мәләкәс һәм Иштирәк авылларының әнә шундый җыены күңелле мизгелләр белән башланып китте. Сәхнә түренә 55 ел бергә матур, тату...
Районда авыл җыеннары үткәрү, анда башкарылган эшләр, көнүзәк мәсьәләләр, хәл итәсе проблемалар турында халык белән уртага салып сөйләшү гадәткә керде. Быел да, шул традицияне дәвам иттереп, берләштерелгән җыеннар үткәрелә башлады.
Биклән, Мәләкәс һәм Иштирәк авылларының әнә шундый җыены күңелле мизгелләр белән башланып китте. Сәхнә түренә 55 ел бергә матур, тату гомер иткән парны - Бакчасарай авылында яшәүче Венера белән Рафис Фәрхетдиновларны чакырдылар. Район хакимияте башлыгы Васил Хаҗиев аларны ихлас күңелдән бу юбилейлары белән тәбрикләде. Аннары район башлыгы яшәеш-көнкүреш, авылларның киләчәгенә кагылган мәсьәләләр, бүгенге көнгә районның социаль-икътисади халәте һәм башка көнүзәк мәсьәләләргә тукталды.
- Бүгенге көндә районның икътисадын, халыкның тормыш-көнкүрешен начар димәс идем. Тырышкан, яшим дип җиң сызганып яшәгән кешегә авыл җирендә эше дә, ашы да бар. Бүгенге көндә табигать шартлары тудырган кыенлыкларга карамастан, урып-җыю эшләре яхшы гына бара. Уңыш гектарыннан елына күрә әйбәт. Югалтуларсыз җыеп алырга гына кирәк. Республикада җитештерелә торган итнең 54 процентын безнең район бирә. Бу «Кама Бекон», «Чаллы Бройлер» җаваплылыгы чикләнгән җәмгыятьләре, авыл хуҗалыгы предприятиеләренең рентабльле эшләүләре нәтиҗәсе. Тик, кызганыч, ишле көтү чыккан авыл җирлекләрендә мәгезле эре терлекләр саны елдан-ел кими бара, - диде Васил Гариф улы. Ул шулай ук бәйнә-бәйнә торак-коммуналь хуҗалык, төзелеш, юл-транспорт, эшмәкәрлек, мәгариф, мәдәният өлкәсендәге проблемаларга тукталды. Бу юнәлешләрдә районда алып барыла торган эшләр белән таныштырды.
- Биклән үзешчән сәнгатьне үстерү буенча гел алда булды. Шуңа күрә халык бик теләп йөри торган мәдәният йортын төзекләндерергә кирәк. Дөрес, бу бик күп чыгымнар сорый, әмма халыкның ялын оештыру да мөһим мәсьәләләрнең берсе, - диде Васил Хаҗиев.
Җитәкченең бу өметле теләген хуплагандай, сәхнәгә дәррәү Бикләннең «Хәтфә» фольклор ансамбле чыкты. Берсеннән-берсе матур элеккеге җырларны тыңлап ял да итте халык.
Иң мөһим һәм кызыклы язмаларны Татмедиа Telegram-каналында укыгыз
