Тукай районында гараж эчендә «КАМАЗ» машинасы янган

25 октябрь көнне район территориясендә ике янгын очрагы теркәлде. Иртәнге сәгать 6.30да бердәм диспетчерлык хезмәтенә Яңа Мусабайдан шалтырату килә. Анда гараж эчендә «КАМАЗ» машинасының януын хәбәр итәләр. Урынга Түбән Суыксу янгын сүндерү посты хезмәткәрләре һәм шәһәрдән машиналар килә. Ләкин гараж эчендәге автомобильне коткарып калу мөмкин булмый. Анда бер атна яшәгән, машинасын ерак юлга әзерләгән йөртүче дә битендә, башында, гәүдәсендә һәм кулларында яну җәрәхәтләре ала. Ул бүген БСМПда дәвалана. Янгын автомобильдәге җылыту системасының төзек булмавыннан чыккан дип фаразлана.