Тукай районы Мусабай-Завод авылы китапханәсендә Яңа ел тамашасы узды (Фотолар)

Яшел чыршылы, Кыш бабайлы Яңа ел-һәр баланың иң көтеп алынган бәйрәме ул. Балаларның кышкы ялларына туры килгән бу бәйрәмне күңелле , истә калырлык итеп оештыру максатыннан, Мусабай-Завод авылы китапханәсендә, мәдәният йорты хезмәткәрләре белән берлектә, "Күңелле яллар" исемле Яңа ел тамашасы узды.

Балаларны Кыш бабай капкадан ук каршылады. Алар белән бергәләп чанада да шуып алды.

Ә инде китапханәгә кергәч, балалар Кыш бабайга шигырьләр сөйләп, җырлап та күрсәттеләр , кыш турында табышмакларга җаваплар эзләделәр, шук бабай белән уйнап та алдылар.

Балалар, Кыш бабайдан бүләк алып, алдагы ялларны да шулай күңелле итеп үткәрергә дигән теләктә өйләренә таралышты, дип хәбәр итә Гөлшат Салихова.