Социаль-мәдәни проектлар бәйгесендә районнан дүрт җиңүче

14 ноябрь көнне Казанда "РИТЭК" ААҖ һәм "Лукойл" хәйрия фондының IV социаль-мәдәни проектлар конкурсына нәтиҗәләр ясалды. "Экология", "Туган як", "Спорт һәм мәдәният", "Изгелек" номинацияләрендә узган әлеге бәйгедә 45 муниципаль берәмлектән коммерциянеке булмаган оешмалардан, массакүләм мәгълүмат чараларыннан 600 проект көч сынашты. Шуларның 138е җиңеп чыкты. Җиңүчеләр арасында безнең районнан дүрт проект бар. "Туган як" номинациясендә абсолют җиңүче дип "Патриот" проекты танылды. Җитәкчесе - Кнәз мәдәният йорты директоры Тамара Тузеева. Мәдәният йортында сугышчан дан музеен оештыруга, яшьләрдә патриотик, әхлакый тәрбияне үстерүгә юнәлдерелгән әлеге проект 500 мең сум күләмендәге грантка ия булды.