Пенсиягә чыгу яшен әкренләп арттыру планлаштырыла

Гомумән, закон проекты Дәүләт Думасына 16 июньдә үк кергән иде. Әлеге канунның бер нигезләмәсе – лаеклы ялга чыгу яшен арттыру. Бүгенге көндә ул ир-атлар өчен 60 яшь булса, хатын-кызлар өчен 55 яшь. Пенсия яшен арттыру ел саен өстәлеп барып, ир-атлар 2028 елдан башлап 65 яшьтә, хатын-кызлар 2034 елдан башлап 63 яшьтә лаеклы ялга чыгачаклар. Проектта күрсәтелгән чаралар пенсия акчасы күләмен арттыруга китерәчәк, дип аңлата РФ Пенсия фонды. Монда шулай ук россиялеләрнең уртача яшәү озынлыгы артачагы искә алына. Ягъни бүгенге көндә пенсия түләнелә торган вакыт уртача 20 ел дип исәпләнелә һәм, РФ Хезмәт министры Максим Топилин белдергәнчә, ул 2030 елда да, уртача яшәү озынлыгы арту хисабына, шул ук 20 ел булачак. Бу турыда ул 19 июль көнне Дәүләт Думасы утырышында белдерде. Утырышны исә онлайн режимында Интернет челтәре аша карау мөмкин иде. Шушы ук 19 июль көнне Пенсия фондының Татарстан бүлеге нәкъ шушы сораулар буенча кайнар линия үткәрде. Соңгы вакытта газета хәбәрчеләренә тукайлылар бу мәсьәлә белән мөрәҗәгать итеп, белгечләрдән аңлатма алуыбызны сорыйлар. Без, мөмкинлектән файдаланып, белгечләр белән элемтәгә кердек һәм тукайлылар биргән сорауларны җиткердек.
«Минем әнием авылда сыер савучы булып эшли. Лаеклы ялга чыгуын көтә. Законга үзгәрешләр кергәч, аңа тагын берничә ел эшләргә кирәк булачак, тик әниемнең инде сәламәтлеге дә начар, бу эшен дәвам итә алмас. Аңа җиңелрәк эш тәкъдим ителер микән?» – дигән сорауга белгеч болай җавап бирде: «Пенсиягә чыгу яшен озынайту турындагы законда әлеге сораулар каралмаган. Әгәр сәламәтлеге начар икән, әниегез табиб хезмәт-эксперт комиссиясенә (ВТЭК) мөрәҗәгать итеп, инвалидлык ала ала. Яисә мәшгульлек үзәгенә барып, җиңелрәк эш эзләргә мөмкин», – дип аңлатты.
Икенче бер тукайлыны мондый сорау кызыксындырды: «Чит илләрдә кешеләр, лаеклы ялга чыккач, күпмедер күләмдә акча алып, шул акчага ял итәргә, сәяхәткә китәләр. Пенсия яше арткач, бездә дә шундый чара керер микән?» Белгеч җавабы мондый булды: «Әлеге закон проекты чит ил тәҗрибәсенә таянып эшләнмәде. Ә бер тапкыр бирелә торган түләүгә килгәндә, әгәр дә кешенең дәүләт яисә дәүләтнеке булмаган пенсия фондларында тупланмалары җыелып бара икән, ул кеше пенсиягә чыкканда шушы акчаны берьюлы алу турында гариза яза ала. Һәм шушы тупланма аңа кайтарыла».
Әлеге закон проектына күпчелек депутат ризалык бирде, каршылык белдерүчеләр дә булды. Шулай итеп, беренче укылышта проект кабул ителде. Көзге сессиядә исә пенсиягә чыгу турындагы үзгәрешләр турындагы закон проектын депутатлар янәдән караячаклар.

Закон проекты нигезендә кемнәр кайсы елда лаеклы ялга чыга

Таблицадагы мәгълүмат Garant системасыннан алынды.