Онытырга хакыбыз юк

admin, 30 октябрь 2020 - 08:00

703

30 октябрьдә без Сәяси репрессия корбаннарын искә алу көнен билгеләп үтәбез. Бүген без бернинди нигезсез, нахакка гаепләнеп сөрелгән, тоткынлыкка озатылган, гомерләре вакытсыз киселгән ватандашларыбызны искә алабыз. Узганга кайтып, ярдәм итә алмасак та, аларны онытырга безнең хакыбыз юк. Тарихыбызның фаҗигале битләре хәтеребездән җуелмасын, андый гаделсезлекләр бүтән беркайчан да кабатланмасын өчен барын да эшләргә тиешбез.

Безнең районда бүген репрессия корбаны булган 16 кеше бар, алар Күзкәй, Иштирәк, Борды, Калмаш, Круглое Поле, Иске Абдул, Кече Шилнә, Мусабай-Завод, Яңа Троицкий, Сәмәкәй авыл җирлекләрендә гомер итә. Авыр сынауларны узып та сынмаган, сыгылмаган якташларыбыз алар. Аларның бүгенге тормышлары имин булсын, якыннарының кадер-хөрмәтендә хәерле гомер кичерергә язсын. Барыгызга да сәламәтлек, гаилә бәхете, бәрәкәтле тормыш телим!