Өмет нуры сүнмәсен

«Энергетик» мәдәният сараенда район башлыгы игелек марафонының чираттагысына старт бирде. Чара елдагыча бәйрәм төсендә оештырылган иде. Фаил Мисбахович аны моңсу бәйрәм дип атады. Чынлап та, бу көнне сәхнәгә чакырып бүләкләнгән, видеоязмаларда тормышларының берничә мизгеле генә күрсәтелеп тә, йөрәкләрне тетрәндергән кешеләрнең язмышлары берәүне дә битараф калдырмаслык шул. Ә андыйлар ярдәм өмет итә. Тукай районында 3 меңнән артык инвалид яши, шуларның 176сы балалар. «Аларга ярдәм итә алу – сәламәт кеше өчен бәхет. Күңелләребезгә рәхәтлек, рух байлыгы өсти», – диде район җитәкчесе. Һәм: «Бу суммалар тиешле адресатларын табар», – дигән сүзләр белән марафонның хисап комиссиясенә район хакимияте коллективының 157 мең сумлык кертемен тапшырды. 
Марафон инвалидлар ункөнлеге кысаларында үтте, анда район инвалидлар җәмгыятенең эшчәнлеге турында мәгъ-лүмат бирелде. Җәмгыять-нең җитәкчесе Галимҗан Зарипов район күләмендә һәм авыл җирлекләрендә үткәрелгән чаралар турында сөйләде. Узган елгы «Игелек кыл» акциясендә җыелган 1 млн 750 мең сумның быел нинди максатларга тотылуына хисап тотты. Инвалид коляскасы, авырулар өчен махсус диван һәм караватлар, матраслар, дарулар һәм башка дәвалау чаралары, кирәк-яраклар – барлыгы 1 млн 481 мең 781  сумлык булган. Галимҗан Сәетҗанович оешма һәм предприятиеләрнең адреслы ярдәме 187 мең 969 сумлык булганын да әйтте. «Киләсе елда да инвалидлар тормышына битараф булмасак иде», – дип өндәде. 

Һәркем – йөрәге кушканча 

«Энергетик» сәхнә-сенә бер-бер артлы кү-тәрелгән коллективлар һәм җитәкчеләр һәркайсы фонд казнасына үз өлешен салды. Район башлыгы урынбасары Рөстәм Закиров белән бергә чыккан авыл җирлеге башлыклары 40 мең сум кертте. Авыл хуҗалыгы идарәсе башлыгы Рәшит Хәбетдинов хуҗалыклар һәм барлык тармак хезмәткәрләре исеменнән 320 мең сумны тапшырды. Елның авыр килүенә карамастан, эшмәкәрләр өлеше дә саллы булды: район эшмәкәрләре исеменнән сүз алган Айгөл Ханова барлыгы 235 мең сум җыелганлыгын әйтте. Җир һәм милек мөнәсәбәтләре палатасы рәисе Илмир Яппаров төзелеш һәм торак-коммуналь хуҗалыгы тармакларыннан барлыгы 320 мең сум күчерелүен белдерде. Фондка Яшьләр эшләре, спорт һәм туризм бүлеге, мәдәният бүлеге хезмәткәрләренең өлеше дә керде. Алар да шулай ук сәхнәгә чыгып, теләктәшлек белдерделәр, марафон казнасына үз өлешләрен керттеләр. 
Шушы урында мәдә-ният һәм социаль яклау хезмәткәрләренең көче белән әзерләнгән кичәнең оешкан төстә үтүен һәм аларның бу тырышлыгы акциягә керткән өлешләре итеп кабул ителүен дә әйтергә кирәк.

Ярдәм итү – көндәлек эш

Көндәлек хезмәтләрендә инвалидлар һәм сәламәтлеге буенча мөмкинлекләре чик-ләнгән кешеләр белән очрашып торучылар, алар белән якыннан торып эшләүчеләр бар. Социаль яклау хезмәт-кәрләренең хезмәт вазифасы нәкъ менә шуннан гыйбарәт тә. Әмма алар акциядән дә читтә калмады: бүлек башлыгы Эльмира Ахунова барлык тармак белгечләре исеменнән фонд казнасына акчалата өлеш кертте. 
Медицина хезмәткәр-ләренең дә һөнәри бурычлары – авыруларның хәлен җиңеләйтү. Район үзәк дәва-ханәсе баш табибы урынбасары Резедә Мөхәммәтшина үзләрен инвалидларның күңел халәтен дә аңлаучылар дип атады һәм фондка 200 мең сум акча тапшырды.  
Сәхнәгә бердәм булып күтәрелгән педагоглар исе-меннән сүз алган мәгариф идарәсе башлыгы Наил Габдуллин да: «Безнең укытучылар көн саен биш мең бала белән күзгә-күз очраша, алар арасында инвалидлар ике йөзгә җитә яза. Мөмкинлекләре чикле балаларның хәлен без яхшы беләбез», – дип ассызыклады һәм педагоглар туплаган 205 мең сумны хисап комиссиясенә тапшырды.  

Читтә дә беләләр

«Игелек кыл да суга сал, халык белмәсә, балык белер» дигән әйтем бар. Әмма халык белә, яхшы гамәлләр турындагы әйбәт хәбәрләр тарала, теләктәшлек тә таба. Әнә бит, Тукай районында Игелекле марафон уздырылуын хәзер республикадан читтә дә беләләр, хәтта катнашалар да. Моның ачык дәлиле – Самара өлкәсенең Новокуйбышевск шәһәрендәге  хәйрия фондыннан килеп ирешкән ярдәм. «Достижение» дип аталучы әлеге фонд Теләнче Тамактагы интернат-мәктәптә тәрбияләнүче балаларның күңелләрен күрү җаен тапкан. Иске Дөрештә янгыннан зыян күрүчеләргә булышкан. Район башлыгының Рәхмәт хатын алырга сәхнәгә чакырылган фонд вәкилләре мохтаҗларга ярдәм итү мөмкинлеге бирелгәнгә рәхмәт тә әйттеләр әле.

Хыяллар чынга аша

«Энергетик» сәхнәсе дә, тамаша залында утыручылар да бу көнне хыялларның чынга ашуына шаһит булдылар. Мәрхәмәтле райондашларыбыз авыру балаларның күңелен күреп савап җыйды. 
Боерган кызы Ләйсән Шамилова башта үзе бүләк ясады: бик тырышып, бөтен күңелен биреп, матур җыр башкарды. Аннары аңа: «Игелеккә кеше кешедән өйрәнә. Ләйсән, сине бәхетле итәсебез килә!» – дип, ТР Пенсия фонды идарәсе башлыгы исеменнән бассейнга йөрү өчен сертификат һәм наушник бүләк иттеләр. 
Яңа поселогында яшәүче Риназ Шәрифуллин тиз йөрешле велосипед турында хыялланган. Аның хыялы турында «КамаТрансНефть» оешмасы җитәкчесе Равис Хашимов ишеткән. Һәм Риназ велосипедлы булды. 
Яңа поселогыннан Шакировлар гаиләсендә Ильяс исемле авыру малай үсеп килә, аны тәрбия кылу чыгымнары арта тора. Бу гаилә өйләренә ремонт ясау хыялы белән яши. «Альфа» компанияләр төркеме җитәкчесе Павел Лебедев Шакировларга ярдәм йөзеннән 100 мең сумлык сертификат алып килгән. 
Ярдәм дәвамлы була. Бәтке авылыннан Кичатыйлар моны яхшы белә. Йортлары янып торыр урынсыз калган бу гаиләгә тукайлылар өйле булырга ярдәм итте. Янгыннан соң тернәкләнүе, тормышны рәткә салуы авыр. Ләкин Виктория әле кечкенә, өстәвенә, авыру да. Ул планшет турында хыяллана. Кызчыкка район башлыгы Фаил Камаев планшет-компьютер бүләк итте. 
Калмиядән Рәдис Мөс-лиховка «Агросила» АҖ элеваторы җитәкчесе Фәнис Таҗетдинов телефон алып килгән. Рәдиснең генә түгел, аның әнисе Гөлчәчәкнең дә хыялы бар икән: зур сәхнәдә чыгыш ясау. «Энергетик» сәхнәсендә җыр башкарып, ул да теләгенә иреште. 
Декабрь – Кыш бабайга хат яза, аннан бүләк көтә торган вакыт. Ә менә Казаклар авылы кызы Миләүшә Шаһиевага хыялындагы ноутбукны «Тукай су каналы» җитәкчесе Григорий Петров Кыш бабайдан да алдарак китереп җиткерде. Сосновый Бор егете Нияз Сәйфиев та ноутбуклы булды, аңа бүләкне «Татарстан коммуналь челтәрләре» предприятиесе башлыгы Риф Миңнекәев ясады.

Алтын йөрәкле кеше 

Районда үткәрелә торган акцияләрдә, һәртөрле чараларда катнашып килүче, тукайлыларның ярдәмчесенә, чын дустына әверелгән «Чаллы икмәге» АҖ директоры Рафаэль Юнысов «Алтын йөрәкле кеше» исеменә лаек булды. Бу хакта ишеткәч, Рафаэль Сөләйманович бераз уңайсызланып калды һәм Фаил Камаевтан исемнең символын – статуэткасын кабул итеп алганда: «Тукай районында бу мәгънәле исемгә лаек кешеләр күп икәнен беләм. Миңа бирергә карар иткәнсез икән, алмый хәлем юк», – дип рәхмәтен белдерде, Игелек марафонының «Мактау китабы»на имзасын салды.
Рафаэль Юнысов, әлбәттә, буш кул белән килмәгән: ул авыру кызчык Алия Сәйфетдиновага операция ясату өчен акчалата ярдәм итәчәген әйтте. «Шушындый акцияләрдә район башлыгының үз почеркы, аңа гына хас эш стиле күренә», – дип марафонга мөнәсәбәтле фикерен дә, барлык тукайлыларга: «Барыгызга бер фикердә булып, бер йодрык кебек яшәргә язсын!» – дигән теләкләрен дә белдерде Рафаэль Сөләйманович. 
Игелек марафоны елъяз-масының өр-яңа битен ачтык. Ел дәвамында ул игелекле эшләр һәм миһербанлы кешеләр исемлеге белән тулылана барыр, чөнки марафон – дәвамлы чара. Сәламәтлеккә туенмаган кешеләргә акчалата һәм әйберләтә ярдәм итәргә, игелек кылырга беркайчан да соң түгел. Халыкта да «Игелекнең иртәсе-киче юк» диләр бит. Ә матди ярдәмгә кушып бүләк ителгән йөрәк җылысының кыйммәте һәм шифасы тагын да зуррак.

/ Рөстәм Зәкиев фотолары.