Мөфти республикада ни өчен намаз вакыты үзгәрүенә аңлатма бирде

Татарстан мөфтие Камил хәзрәт Сәмигуллин интервьюда ни өчен републикада 5 майдан августка кадәр намаз вакыты үзгәрүенә аңлатма бирде.

Май аеннан башлап (Казан өчен - 5 майдан) һәм август башына кадәр, кояш баткандагы шәфәкъ яктылыгы иртәнге шәфәкъ аклыгы белән кушыла, ягъни төн дәвамында офыкта яктылык югалмый. Шул сәбәпле, төнге намаз вакытын билгеләү мөмкин түгел.

“Элек мондый очракта намаз укырга кирәкми кебек бәхәсләр булган иде. Әмма Мәрҗәни бу эштә нокта куйган, “Назурат аль-хакк фи фардыйа аль-иша ва ин лям йагыб аш-шафак” китабын язган. Анда барыбер бишенче намазны укырга кирәк һәм моны якындагы урында эшләргә диелгән. Безнең өчен бу Әстерхан өлкәсе”, - дип билгеләп үтте Сәмигуллин.

Моңа бәйле рәвештә, астрономик исәпләүләр ярдәмендә, төнге ястү намазы башлануның төгәл вакытын, шулай ук сәхәр тәмамлануны һәм иртәнге намаз вакыты керүне билгеләп булмый. Бу безнең төбәкнең географик үзенчәлекләренә бәйле.

Шул сәбәпле, ислам галимнәре фикеренә нигезләнеп, әлеге вакытны сәгатьләр буенча исәпләргә карар кылынды. Ястү намазын - кояш баеп, 1,5 сәгать вакыт узгач, ә сәхәр тәмамлану һәм иртәнге намаз вакыты керү - кояш чыгарга ике сәгать алдан була, дип кабул ителә.

Бу уңайдан тулырак мәгълүматны Татарстан мөселманнары Диния нәзарәте сайтында табарга мөмкин.