Кече Шилнәнең үз паркы булачак

Төзекләндерүнең беренче этабында территориядә җәяүлеләр сукмаклары, яктырту җайланмалары, балалар мәйданчыгы һәм башка уңайлыклар барлыкка килде. Киләсе елда икенче этапта Кече Шилнәдә масштаблы эшләр башкарылачак. Ял паркы Ленин урамы артындагы мәйданда булдырыла, биредә инде берничә ел рәттән Сабантуй бәйрәмен үткәрәләр. Кече Шилнәне төзекләндерү проектын республика программасының подрядчыларының берсе булган «Платформа» архитектура бюросы эшләгән. Белгечләр барысын да уйлап проектка керткәннәр: балалар мәйданчыгын, түбәле ял зонасын, сәхнә һәм амфитеатр белән зонаны, бәдрәфне, воркаутны, үзәк мәйданны, кафены, спорт мәйданчыгын, памптрекны, җәяүлеләр һәм автомобиль күперләрен, шулай ук парковканы һәм каты көнкүреш калдыклары өчен мәйданчыкны да анда күрергә мөмкин. Парк кыш көне дә актив кулланылачак, монда чаңгы трассасы ясарга телиләр. Кыскасы Кече Шилнәдә бөтен уңайлыклары булган заманча парк тиздән биредә яшәүчеләрне шатландырачак.