Көчле җил авылларга зыян салды

Ураган, кызганычка каршы, район авылларына шактый зыян китерде. Көчле җил Күзкәй, Яңа Троицкий, Калмаш, Калмия, Казаклар авылларында һәм шул яктагы башка җирле пунктларда бакчаларда теплицаларны куптарды, коймалар ауган урыннар бар. Күзкәйдә «Ярыш» хуҗалыгының терлекчелек комплексы түбәсе купкан. Зыян күргән мәйдан якынча 900 кв. метрны тәшкил итә. Электр үткәргечләргә зыян килеп, 15 авылда ут бетеп торды. Төзексезлек берничә сәгать эчендә бетерелде. Бәхеткә, басулардагы авыл хуҗалыгы культураларына зыян килмәде. Табигать сынавы – һәркемгә уйланырга сәбәп. Төзелеш һәм ремонт эшләре сыйфатлы башкарылырга тиеш, иген мәйданнарын исә иминиятләштерү зыян итми. Бу турыда район башлыгы Фаил Камаев тагын бер кат кисәтте.