Интехбанк кертемчеләре иминиятләштерелгән акчаларын ала башлады

12 гыйнвардан банк-агентлар ИнтехБанк кертемчеләренә иминиятләштерелгән акчаларын кайтара башладылар. Аның өчен Саклык Банкы, ВТБ 24 һәм «Ак Барс» банкы билгеләнде. Искә төшерәбез, акчаларны физик затлар кайтаруга хокуклы. Аларга кертемнәренең иминиятләштерелгән өлеше - 1,4 млн сумга кадәре бирелә. Үзенә кайсы банкка мөрәҗәгать итәргә кирәклеген клиент Кертемнәрне иминиятләштерү агентлыгы (АСВ) рәсми сайтының «Найди свой банк-агент» бүлекчәсенә кереп белә ала.

Кертемнәрне иминиятләштерү агентлыгы ИнтехБанкның иминият җаваплылыгын якынча 13,9 млрд сум дип билгеләгән. Моннан тыш, шушы көннәрдә Интехбанкның счетларын өлешчә эшләтеп җибәрү турында да хәбәр булган иде. Кертемчеләргә мораторийдан соң күчерелгән счетларыннан файдалану мөмкинлеге барлыкка килде, дип ачыклык кертте ТР икътисад министры Артём Здунов.