Халык ансамбле исемен яклаячаклар

6 декабрьдә Иске Җирекледәге «Дуслык» күпфункцияле үзәгендә өч үзешчән халык коллективы үзләренең чыгышларын тәкъдим итәчәк. Районыбызның «Әллүки» халык фольклор коллективы (Күзкәй авылы), «Питрау» халык фольклор коллективы (Мәләкәс авылы), Түбән Кама районы Кама Аланыннан «Утмалтурат» чуваш халык фольклор коллективлары бу көнгә махсус программа әзерли. Бу чираттагы мәдәни чара гына булмаячак, фольклор коллективлары шул рәвешле үзләренең халык ансамбле дигән абруйлы исемнәрен тамашачы алдында яклаячак. Район мәдәният бүлегенең сәнгать җитәкчесе Алия Мөхәммәтханова хәбәр итүенчә, ТР Мәдәният министрлыгыннан килгән яңа кагыйдәләр нигезендә ансамбльләр өч елга бер тапкыр халык исеменә лаек булуын расларга тиеш. Чара 17 сәгатьтә башлана. Керү ирекле. Рәхим итегез!